Ajar Ǵınııat Atyraýda 105 júkti áıel koronavırýstan emdelip jatqan statsıonarǵa bardy

ATYRAÝ. QazAqparat - Densaýlyq saqtaý vıtse-mınıstri Ajar Ǵınııat Atyraý qalasyndaǵy modýldik statsıonarda boldy, dep habarlaıdy QazAqparat.

Búgin Atyraý oblysyna jumys sapary aıasynda Densaýlyq saqtaý vıtse-mınıstri Ajar Ǵınııat oblystyq aýrýhananyń juqpaly aýrýlar bóliminde boldy.

Modýldik statsıonar 200 tósekke eseptelgen, biraq búgingi kúni ınfektsııalyq bólimshede 205 adam, onyń ishinde 105 júkti áıel em alyp jatyr.

Reanımatsııada 25 patsıent bar, onyń úsheýi – aýyr haldegi júkti áıelder.

Aýrýhana 2020 jyly salynǵan.

Nysanda taza aımaqqa, qoljetimdiligi shekteýli aımaqqa (jartylaı) jáne oqshaýlaý aımaǵyna bólý standarttary qoldanylady.

Qyzmetkerler men patsıentterge arnalǵan dálizder kross-ınfektsııanyń aldyn alý úshin qatań rettelgen.

Modýldik ınfektsııalyq statsıonardyń búkil palatalary ottegimen tolyq qamtamasyz etilip, árbir patsıentke jetkizildi.

Aýrýhanada koronavırýs ınfektsııasymen aýyratyn naýqastardy emdeýge arnalǵan barlyq qajetti jabdyqtar men dári-dármek bar.

Ajar Ǵınııat óńirdegi jaǵdaı kúrdeli ekenin atap ótip, covid-19-ǵa qarsy kúreste aldyńǵy qatarda júrgen dárigerlerge rızashylyǵyn bildirdi.