Ázerbaıjannyń Qazaqstandaǵy elshisi Halyqaralyq Túrki akademııasynyń altyn medalimen marapattaldy
Túrki akademııasynyń altyn medali elshiler arasynda alǵash ret berilip otyr.
«Ázerbaıjannyń Qazaqstandaǵy elshisi Rashad Mammadov myrza osy ýaqyt aralyǵynda óte kóp jumys atqardy. Elshi bolyp taǵaıyndala salysymen, akademııaǵa kelip, mýzeıdi qurýǵa kómektesti. Óte kóp sharalardy birge ótkizdik, kóptegen kitaptar aýdaryldy. Biz Túrki akademııasynyń arnaıy sheshimimen Rashıd Mammadov myrzany osy bes jyldaǵy qyzmetine baılanysty akademııanyń arnaıy altyn medalimen marapattaǵymyz kelip otyr. Aıta keterligi, elshiler arasynda bul altyn medal alǵash ret berilip otyr», - dedi Halyqaralyq Túrki akademııasynyń prezıdenti Darhan Qydyráli elordada Ázerbaıjan týraly jańa kitaptardyń tusaýkeserinde.
Óz kezeginde Rashad Mammadov Túrki akademııasynyń ortaq ıgilik bolyp sanalatynyn jetkizdi.
«Akademııa jyldar boıy tarıhı, geografııalyq, ádebı jáne odan da basqa kitaptardy shyǵaryp, Ázerbaıjandy baýyrlas halyqtarǵa, baýyrlas halyqtardy Ázerbaıjanǵa tanyta aldy. Ortaq tarıhymyz ben ortaq geografııamyz jazyldy. Búgin de meni arnaıy altyn medalmen marapattaýdy uıǵarǵan eken, men atqarǵan, atqarýǵa tyrysqan jumystardyń barlyǵy – meniń qyzmettik mindettim. Túrki akademııasyn damytý men halyqtarymyzdy jaqyndata túsý – bizdiń basty maqsatymyz bolýy kerek», - deıdi Ázerbaıjan elshisi.
Aıta keteıik, Halyqaralyq Túrki akademııasy Túrki Memleketteri Táýelsizdiginiń 30 jyldyǵy aıasynda «Qarabaq – Ázerbaıjannyń jaýhary: tarıhy, mádenıeti, tabıǵaty», «Joǵalǵan baqyt: Qarabaqtyń shynaıy oqıǵalary» jáne «Ázerbaıjan Halyq Respýblıkasy» kitaptaryn shyǵardy.
Alqaly jıynǵa Halyqaralyq Túrki akademııasynyń prezıdenti Darhan Qydyráli, Ázerbaıjan Respýblıkasynyń Qazaqstandaǵy Tótenshe jáne Ókiletti elshisi Rashad Mammadov, Qyrǵyz Respýblıkasynyń Qazaqstandaǵy Tótenshe jáne ókiletti elshisi Jeenbek Kýlýbaev, Ózbekstan Respýblıkasynyń Qazaqstan Respýblıkasyndaǵy Elshiliginiń Birinshi hatshysy Mýzaffar Ýsmanov, S.Seıfýllın mýzeıiniń dırektory Nesipbek Aıtuly, Ázerbaıjan ulttyq májilisiniń mádenıet komıtetiniń basshysy, qoǵam qaıratkeri, jýrnalıst Ganıra Pashaeva jáne túrkııalyq jazýshy, Eýrazııa jazýshylar odaǵynyń tóraǵasy ıAkýp Ómeroǵly jáne basqa da memleket jáne qoǵam qaıratkerleri, Qyrǵyzstan, Ózbekstan jazýshylary, zııaly qaýym ókilderi qatysty.
