Ázerbaıjannyń Baký jáne Shekı qalalarynda Syr eliniń mádenıet jáne óner kúnderi ótedi
QYZYLORDA. QazAqparat - Aldaǵy sáýir aıynyń 10-16 kúnderi aralyǵynda Qyzylorda oblysynyń Ázerbaıjan Respýblıkasyndaǵy mádenıet jáne óner kúnderi aıasynda Baký jáne Shekı qalalarynda gastroldik sapary uıymdastyrylady.
Oǵan oblystyq teatr jáne fılarmonııanyń shyǵarmashylyq ujymdary qatysyp, óner kórsetedi. Sondaı-aq, Astana qalasynda EKSPO-2017 halyqaralyq kórmesi aıasynda Qyzylorda oblysynyń óner kúnderi ótedi dep josparlanýda.
Bul týraly búgin Óńirlik kommýnıkatsııalar qyzmetinde ótken baspasóz máslıhatynda oblystyq mádenıet, arhıvter jáne qujattama basqarmasynyń basshysy Erjan Ábdirahmanov málimdedi,-dep habarlady QazAqparat HAA tilshisi.
Aımaǵymyzda Elbasy Joldaýy oblystyq mádenıet jáne óner mekemeleri qyzmetkerleriniń arasynda keńinen nasıhattalyp, túsindirme jumystary júrgizilip keledi. Osy Joldaýdan týyndaıtyn basym baǵyttardyń biri «Tsıfrlyq Qazaqstan» baǵdarlamasy aıasynda «Elektrondy arhıv», «Elektrondy kitaphana», «Vırtýaldy mýzeı» aqparattyq júıelerin qalyptastyrý, jetildirý, azamattardyń tıisti aqparattarǵa qoljetimdiligin qamtamasyz etý maqsatynda arnaıy is-sharalar ázirlenip, jumystar atqarylýda.
Brıfıng barysynda basqarma basshysy búgingi kúnge deıin arhıvte saqtalǵan 96 myń 917 qujattyń 10 mln.ǵa jýyq paraǵy sandyq formatqa kóshirilip, saqtandyrý qorlary jasalǵandyǵyn aıtty. «Tsıfrlyq júıege birinshi kezekte qundy qujattar engizilýde. Qazir oblys boıynsha ólketaný baǵytyndaǵy 3343 kitap, 1941-1969 jyldary basylyp shyqqan «Lenın joly», «Pýt Lenına» gazetteri tsıfrlyq formatqa kóshirilgen. Jańa tehnologııalardy paıdalaný maqsatynda aldaǵy ýaqytta teatr, fılarmonııa, oblystyq tarıhı-ólketaný murajaılarynyń bıleti onlaın rejiminde júrgizilmek», - dep atap ótti ol.
Erjan Ahmetulynyń sózine qaraǵanda, bıylǵy mádenıet salasyndaǵy josparlanǵan sharalar EKSPO-2017 halyqaralyq kórmesi men Memlekettik rámizderdiń 25 jyldyǵy, taıaý jáne alys sheteldermen dıplomatııalyq qarym-qatynastyń 25 jyldyǵyna arnalyp otyr.
