Ázerbaıjannyń aýyr atletıka federatsııasy tolyqtaı qaıta qurylady

BAKÝ. Trend – QazAqparat - Ázerbaıjannyń aýyr atletıka federatsııasy tolyqtaı qaıta qurylady. Osyndaı buıryqqa juma kúni federatsııa prezıdenti Djahangır Askerov qol qoıdy, dep habarlaıdy QazAqparat Trend-ke silteme jasap.

Buıryqqa sáıkes, federatsııanyń bas bapkeri Asıf Mamedov pen bas hatshy Rızvan Rasýlov qyzmetterinen bosatyldy.

Mundaı sheshim olardyń óz qyzmetterin oıdaǵydaı atqarmaýyna baılanysty qabyldanǵan. Basshylyqtyń birneshe ret jasaǵan eskertýine qaramastan, qyzmetkerler óz jumysyn durys atqarmaǵan.

Federatsııa qyzmetkerleriniń jaýapsyzdyq tanytýy, antıdopıng erejelerine baǵynbaýy saldarynan Halyqaralyq aýyr atletıka federatsııasy aıtarlyqtaı aıyppul sanktsııalaryn salǵan.

Tek sońǵy kezeńniń ózinde ázerbaıjandyq aýyr atletter alty ret dopıng paıdalanǵan.

«Qoldanylǵan sharalar oń nátıje bergen joq. Osyǵan baılanysty Aýyr atletıka federatsııasyn tolyqtaı qaıta qurý týraly sheshim qabyldandy. Bul ózgerister bolashaqta jaqsy nátıje kórsetedi dep úmittenemiz», - dedi Djahangır Askerov.

Onyń aıtýynsha, qyrkúıektiń sońyna deıin federatsııanyń jańa bapkeri men bas hatshy taǵaıyndalady.