Ázerbaıjannyń arnaıy qyzmeti Bakýde uıymdastyrylmaq bolǵan teraktiniń aldyn aldy

ASTANA. QazAqparat - Ázerbaıjannyń Memlekettik qaýipsizdik qyzmeti júrgizgen arnaıy operatsııa barysynda Bakýde ótýi tıis mıtıng barysynda terakt uıymdastyrmaq bolǵan toptyń joly kesildi. Bul týraly Memlekettik qaýipsizdik qyzmetiniń baspasóz qyzmeti taratqan málimetterde aıtylǵan, dep habarlaıdy Trend.

Memlekettik qaýipsizdik qyzmetiniń ókilderi Ázerbaıjan memleketiniń aýmaǵynan tys jerde áreket etetin dinı-ekstremıstik, terrorıstik uıymynyń bir top adamdary Bakýdiń Garagadak aýdanynyń Lokbatan aýylynda ornalasqan úıinde Ázerbaıjan azamaty Alekberov Bahtııar Mamedsadyg oglyny «ámir» etip saılap alǵandyǵyn anyqtady.

Atalǵan top músheleri terakt uıymdastyrý úshin túrli jarylǵysh zattardy qoldan jasaǵan jáne olardy 22 qazan kúni Lokbatan aýylynda synaqtan ótkizgen. Sonymen qatar, atalǵan top músheleri 28 qazanda Bakýde ótýi tıis mıtıng barysynda terakt uıymdastyrý jóninde kelisimge kelgen.

25 qazan kúni Memlekettik qaýipsizdik qyzmeti júrgizgen arnaıy operatsııa barysynda qylmystyq top músheleri - Alekberov Bahtııar Mamedsadyg oglý, Masımlı Anar Mehman oglý, Gýseınlı Djavıd Gýseın oglý qarýly qarsylyq kórsetip, Memlekettik qaýipsizdik qyzmetiniń arnaıy toby olarǵa qarsy uıymdastyrylǵan qarymta sharalar barysynda qylmyskerlerdiń kózin joıdy.