Ázerbaıjannyń Ortalyq Azııa elderimen taýar aınalymy 50%-dan astam ósti
ASTANA. KAZINFORM — Ázerbaıjannyń Ortalyq Azııa elderimen taýar aınalymy ótken jyly 50 paıyzdan astamǵa artty. Bul týraly Ázerbaıjan Prezıdenti Ilham Álıev Túrikmenbashy qalasynda ótken Ázerbaıjan men Ortalyq Azııa memleketteri basshylarynyń segizinshi konsýltatıvtik kezdesýinde málimdedi, dep habarlaıdy Kazinform agenttiginiń Bakýdegi menshikti tilshisi.
Álıevtiń aıtýynsha, saýda baılanystarynyń keńeıýi ınvestıtsııalyq yntymaqtastyqtyń artýymen qatar júrip jatyr. Qazir Ázerbaıjanda Ortalyq Azııa elderiniń kapıtaly qatysatyn 400-den astam kompanııa jumys isteıdi. Sonymen qatar Baký Qazaqstan, Ózbekstan jáne Qyrǵyzstanmen birlesip, árqaısysynyń kapıtaly júzdegen mıllıon dollar bolatyn ınvestıtsııalyq qorlar qurdy.
- Ózara saýdany ǵana arttyrý jetkiliksiz, birlesip ınvestıtsııa salyp, ónim óndirip, syrtqy naryqtarǵa shyǵý mańyzdy, – dep atap ótti ol.
Ázerbaıjan Prezıdenti yntymaqtastyqtyń negizgi baǵyttarynyń biri retinde kólik salasyn atady. Onyń aıtýynsha, Kaspıı teńizi Ortalyq Azııany Ázerbaıjanmen jáne odan ári halyqaralyq naryqtarmen baılanystyrýda barǵan saıyn mańyzdy ról atqaryp keledi. Kaspıı arqyly júk tasymaly kóleminiń artýyna baılanysty elderdiń ortaq mindeti – kólik baǵyttarynyń tıimdiligi men básekege qabilettiligin arttyrý.
Álıev energetıka salasyna da erekshe nazar aýdardy. Onyń aıtýynsha, Ázerbaıjan Ortalyq Azııadan halyqaralyq naryqtarǵa energııa resýrstaryn tasymaldaýda mańyzdy ról atqarady. El aýmaǵy arqyly Qazaqstan men Túrikmenstannyń munaıy tasymaldanady. Bul tasymal kólemi de artyp keledi.
Ol jańartylatyn energetıkany da yntymaqtastyqtyń perspektıvaly baǵyttarynyń biri dep atady. Ázerbaıjan Qazaqstan jáne Ózbekstanmen birlesip, jasyl energetıkalyq dáliz qurý boıynsha jumys júrgizip jatyr.
Kezdesý qorytyndysy boıynsha Ázerbaıjan Ázerbaıjan men Ortalyq Azııa memleketteri basshylarynyń konsýltatıvtik kezdesýleri formatynyń tóraǵasy bolyp biraýyzdan saılandy.
Buǵan deıin Qasym-Jomart Toqaev Ortalyq Azııa elderi men Ázerbaıjanǵa ózara saýda kólemin 20 mıllıard dollarǵa deıin arttyrýdy usynǵan edi.
