Ázerbaıjannyń Qarabaq jylqysy «Uly dala joryǵy» marafon-báıgesine qatysady

ASTANA. KAZINFORM –  «JORYQ» respýblıkalyq at sporty federatsııasynyń jetekshisi Baqytjan Turlybekov Ázerbaıjan Respýblıkasynyń Qazaqstandaǵy Tótenshe jáne Ókiletti Elshisi Aǵalar Atamoǵlanovpen kezdesti. 

QR Ulttyq sport qaýymdastyǵy málim etkendeı, kezdesý barysynda álemde teńdesi joq «Uly dala joryǵy» biregeı jobasy jan-jaqty talqylandy. 

B.Turlybekov dıplomatty aldaǵy marafon-báıgege daıyndyq barysynda tyǵyz yntymaqtastyq úshin Ázerbaıjan Respýblıkasynyń at sporty federatsııasymen baılanys ornatýǵa yqpal etýge shaqyrdy.

Buǵan jaýap retinde Ázerbaıjan Elshisi At sporty federatsııasynyń jobalaryn, sonyń ishinde Ázerbaıjan shabandozdarynyń, sondaı-aq álemdegi eń myqty jylqy tuqymdary, Ázerbaıjannyń ulttyq sımvolyna aınalǵan Qarabaq arǵymaqtarynyń «Uly dala joryǵy» marafon-báıgesine qatysýyna yqpal jasaıtynyn jetkizdi. 

Esterińizge sala keteıik, V Dúnıejúzilik kóshpendiler oıyndary qarsańynda ótetin «Uly dala joryǵy» biregeı marafon-báıgesi bıyl Petropavldaǵy Abylaı han rezıdentsııasynan bastalady.

Qazirgi tańda oblystarda aımaqtyq irikteý týrlary júrip jatyr, olardyń jeńimpazdary ulttyq irikteý týryna joldama alady. 

Respýblıkalyq irikteý kezeńinde ornatylǵan eń úzdik jetistikter Qazaqstannyń rekordtar kitabyna (KINES) enedi.