Ázerbaıjannyń Eńbek mınıstrligi men IYU janyndaǵy Eńbek ortalyǵy oqý kýrstaryn ashady

Ázerbaıjannyń Eńbek jáne halyqty áleýmettik qorǵaý mınıstrligi men Islam elderiniń statıstıkalyq, ekonomıkalyq jáne áleýmettik zertteýler jáne oqytý ortalyǵy (SESRIC) birlesken oqý kýrstary, semınarlar jáne tanysý saparlaryn ótkizýge kelisti, dep habarlaıdy Kazinform agenttiginiń tilshisi. 

Islam yntymaqtastyǵy uıymyna (IYU) múshe memleketter eńbek mınıstrleriniń V konferentsııasyna qatysý sheńberinde Bakýde Ázerbaıjan Respýblıkasynyń Eńbek jáne halyqty áleýmettik qorǵaý mınıstri Sahıl Babaevtiń SESRIC dırektory Zahra Zıýmrýt Selchýkpen kezdesýi ótti.

Taraptar SESRIC janyndaǵy Eńbek ortalyǵy men mınıstrlikke qarasty Eńbek naryǵy jáne halyqty áleýmettik qorǵaý ulttyq observatorııasy arasyndaǵy yntymaqtastyqty damytýdyń mańyzyn atap ótti.

Selchýktiń atap ótýinshe, eki mekeme arasyndaǵy qarym-qatynastardy kezeń-kezeńimen keńeıtý úshin tıisti jumys júrgizilip jatyr.

Kezdesýde S.Babaev pen Z.Selchýk mınıstrlik pen SESRIC arasyndaǵy bolashaq yntymaqtastyq baǵyttaryn aıqyndaıtyn ózara túsinistik týraly memorandýmǵa qol qoıdy.

Qujatqa sáıkes, taraptar arnaıy oqý kýrstary, semınarlar, kezdesýler men oqý saparlary sııaqty birlesken is-sharalardy uıymdastyryp, úılestiredi. sondaı-aq birlesken jarııalanymdar, baıandamalar men zertteýler daıyndaý úshin bilim jáne tájirıbe almasady.

Bul is-sharalardyń maqsaty – mınıstrliktiń ınstıtýtsıonaldyq jáne kadrlyq áleýetin nyǵaıtý.

SESRIC nemese Islam elderiniń statıstıkalyq, ekonomıkalyq jáne áleýmettik zertteýler jáne oqý ortalyǵy 1977 jyly mamyrda Trıpolıde ótken Syrtqy ister mınıstrleriniń segizinshi Islam konferentsııasynda qabyldanǵan qarardy oryndaý maqsatynda Islam Yntymaqtastyq Uıymynyń qosalqy organy retinde quryldy.