Prezıdent: Ázerbaıjanmen saýda-ekonomıkalyq yntymaqtastyqty nyǵaıtý – mańyzdy mindet

ASTANA. KAZINFORM — Memleket basshysy Ázerbaıjan Prezıdentimen kelissóz júrgizdi. Bul týraly Aqordanyń baspasóz qyzmeti habarlady. 

– Sizdi memlekettik saparyńyz aıasynda Qazaqstanda qarsy alý – men úshin úlken mártebe. Bul – elderimizdiń arasyndaǵy strategııalyq seriktestik pen odaqtastyq qatynastardy odan ári damytý turǵysynan óte mańyzdy oqıǵa. Qazaqstan men Ázerbaıjan tek dostas elder emes, sondaı-aq baýyrlas halyqtar. Sondyqtan Sizdiń elińizben san qyrly yntymaqtastyqty órkendetýge basa mán beremiz. Qazirgi kezde Ázerbaıjan Sizdiń qýatty kóshbasshylyǵyńyzben halyqaralyq arenadaǵy abyroı-bedelin eleýli túrde arttyrdy, óz óńirinde yqpaldy memleket retinde óte mańyzdy ról atqarady. Biz úshin Ázerbaıjanmen saýda-ekonomıkalyq yntymaqtastyqty jáne saıası seriktestikti nyǵaıtý – asa ózekti mindet, – dedi Memleket basshysy.

Memleketter basshylary saýda-ekonomıka, ınvestıtsııa, aýyl sharýashylyǵy jáne kólik-tranzıt salalaryndaǵy yntymaqtastyqty nyǵaıtý máselesin jan-jaqty talqylady.

– Búginde Qazaqstan damýdyń joǵary deńgeıin kórsetip otyr. Elińizdegi qoǵamdyq-saıası jaǵdaı turaqty, ekonomıkalyq damý qalypty. Siz júrgizip jatqan reformalardy zor qyzyǵýshylyqpen baqylap otyrmyz. Elińizdi jańǵyrtý men áleýetin arttyrý jolyndaǵy baǵdaryńyzdy tolyq qoldaımyz. Ekijaqty qarym-qatynastyń strategııalyq, odaqtastyq sıpat alǵanyn atap óttińiz. Biz barlyq baǵyttaǵy yqpaldastyqty nyǵaıtýǵa nıettimiz. Búgingi kelissóz, sondaı-aq Joǵary memleketaralyq keńes otyrysy barysynda aýqymdy kún tártibin taǵy da pysyqtap, ózara seriktestiktiń aldaǵy qadamdaryn aıqyndaımyz, – dedi Ázerbaıjan Prezıdenti.

Sondaı-aq mádenı-gýmanıtarlyq yqpaldastyqqa nazar aýdardy.

Taraptar aımaqtyq jáne halyqaralyq kún tártibindegi ózekti máseleler jóninde pikir almasty. 

Aıta ketelik Qasym-Jomart Toqaev Ázerbaıjan Prezıdentin Aqordada qarsy alǵan edi.