Ázerbaıjanǵa úsh jańa baǵyt ashylady
ASTANA. KAZINFORM — Qazaqstan men Ázerbaıjan arasyndaǵy reıster sany aptasyna 30-dan 33 reıske deıin ulǵaıdy, dep habarlaıdy Kólik mınıstrliginiń baspasóz qyzmeti.
Kólik mınıstrligi ushý geografııasyn keńeıtý jáne qoldanystaǵy baǵyttar boıynsha reıster sanyn arttyrý jónindegi jumysty turaqty negizde júrgizip keledi.
Bıylǵy jyldyń 16 maýsymynan bastap AZAL áýe kompanııasy Shymkent — Baký baǵyty boıynsha aptasyna 3 ret jıilikpen jańa turaqty reısterdi oryndaýdy bastady. Nátıjesinde Qazaqstan men Ázerbaıjan arasyndaǵy reıster sany aptasyna 30-dan 33 reıske deıin ulǵaıdy.
Sonymen qatar, áýe kompanııasy Aqtóbe — Baký baǵyty boıynsha aptasyna 3 ret jáne Atyraý — Baký baǵyty boıynsha aptasyna 4 ret turaqty reısterdi oryndaýdy josparlap otyr.
— Jańa baǵyttardyń ashylýy Qazaqstan Respýblıkasy men Ázerbaıjan Respýblıkasy arasyndaǵy saýda-ekonomıkalyq, iskerlik jáne týrıstik yntymaqtastyqtyń odan ári damýyna yqpal etedi, — deıdi vedomstvo ókilderi.
Buǵan deıin Ázerbaıjan júk tasymaldaý kólemin eki esege arttyratynyn jazǵanbyz.
