Ázerbaıjanǵa Ortalyq Azııadan kelgen árbir ekinshi týrıst – Qazaqstannan
ASTANA. KAZINFORM – Ótken jyly Ázerbaıjanǵa Ortalyq Azııadan barǵan árbir ekinshi týrıst Qazaqstannan kelgen. Bul týraly Qazaqstan Respýblıkasynyń Ázerbaıjandaǵy Elshisi Álim Baıel Baký meri Eldar Azızovpen kezdesýinde aıtty.
«Búginde Baký eki el arasyndaǵy ekijaqty saıası, saýda-ekonomıkalyq jáne mádenı-gýmanıtarlyq qatynastardy damytýda erekshe mańyzǵa ıe. Biz qazaqstandyqtardyń Ázerbaıjan megapolısine degen qyzyǵýshylyǵynyń artyp kele jatqanyn baıqap otyrmyz», - dedi Álim Baıel.
Ázerbaıjan Respýblıkasynyń Memlekettik shekara qyzmetiniń málimetinshe, qazaqstandyqtar 2024 jyldyń qańtar-sáýir aılarynda Ázerbaıjanǵa kelgen sheteldikter arasynda besinshi orynda tur.
«Jalpy, ótken jyly Ázerbaıjanǵa Ortalyq Azııadan sapar jasaǵan árbir ekinshi týrıst Qazaqstannan kelgen», - dedi dıplomat.
Elshi sondaı-aq Bakýdi BUU-nyń Klımattyń ózgerýi jónindegi negizdemelik konventsııasy – COP29 Taraptar Konferentsııasynyń 29-shy sessııasyn ótkizýimen quttyqtady.
«Qazaqstan bul sharaǵa belsene qatysady jáne Ázerbaıjanǵa sammıtti sátti uıymdastyrýǵa jan-jaqty qoldaý kórsetýge daıyn», - dedi Qazaqstan mıssııasynyń basshysy.
Óz kezeginde Eldar Azızov baýyrlas Ázerbaıjan men Qazaqstan arasyndaǵy erekshe qarym-qatynasqa, sondaı-aq yntymaqtastyqtyń qazirgi joǵary deńgeıine jetýde prezıdentter Ilham Álıev pen Qasym-Jomart Toqaevtyń róline nazar aýdardy.
«Ázerbaıjan bıznesi Qazaqstanda belsendi jumys istep jatyr. Men qazaqstandyq bıznes ókilderin Bakýge jumys isteýge shaqyrǵym keledi. Merııa qazaqstandyq kásipkerlerge túrli salalarda, sonyń ishinde qurylys salasynda qolaıly jaǵdaı jasaýǵa daıyn», - dep atap ótti Baký qalasy atqarýshy bıliginiń basshysy.
Ekijaqty yntymaqtastyqty damytýdyń naqty sharalaryn talqylaı otyryp, taraptar Baký men Astana arasyndaǵy dostyq baılanysty damytýdyń aldaǵy qadamdaryn qarastyrdy.
