Ázerbaıjanǵa koronavırýsqa qarsy qytaılyq vaktsınanyń 5 mln dozasy jetkizilmek

BAKÝ. QazAqparat – Koronavırýspen kúreste Qytaı men Ázerbaıjan arasyndaǵy yntymaqtastyq aıasynda Bakýge COVID-19 vırýsyna qarsy qytaılyq vaktsınanyń kezekti partııasy jetkizildi. Bul týraly Ázerbaıjan Respýblıkasynyń densaýlyq saqtaý mınıstriniń orynbasary Vıktor Gasymov málim etti, dep habarlaıdy QazAqparat menshikti tilshisi.

«Ázerbaıjanǵa 5 mln doza vaktsına jetkizý týraly 10 kún buryn jasalǵan kelisishartqa sáıkes búgin Qytaıdan Bakýge «Coronavac» preparatynyń 500 myń dozasy jetkizildi. Vaktsınalaý qarqyny joǵary bolǵan saıyn Ázerbaıjandaǵy epıdemıologııalyq ahýal da jyldam turaqtalýda», - dedi jýrnalısterge V.Gasymov.

Sondaı-aq ekpe saldyrý kezinde sóz sóılegen QHR-dyń Bakýdegi elshisi Go Mın Qytaı úkimeti jaqyn arada Ázerbaıjanǵa qytaılyq «SinoVac» vaktsınasynyń 150 myń dozasyn tegin beretinin jetkizdi.

Aıta keteıik, naýryz aıynda Ázerbaıjanda koronavırýsqa shaldyqqandar sany 200-den 2200-ge deıin, ıaǵnı 10 esege ósti. Infektsıonıst Výgar Djavadzade bul jaǵdaıdy elde brıtandyq shtammnyń (B1.1.7) paıda bolýymen baılanystyrady.

Eske sala keteıik, 5 sáýirde Koreıadan Ázerbaıjanǵa birlesken aǵylshyn-shved kompanııasy óndirgen «Vaxzevria» vaktsınasynyń (burynǵy ataýy AstraZeneca) 84 myń dozasy jetkiziledi. Mamyr aıynyń sońyna deıin respýblıkaǵa osy vaktsınanyń 432 myń dozasyn ákelý josparlanyp otyr. Sondaı-aq 8 apta ishinde Ázerbaıjan Respýblıkasyna Pfizer-BioNTech vaktsınasynyń 218 790 dozasy jetkiziledi.

Joǵaryda atalǵan preparattardan basqa, Ázerbaıjan Úkimeti reseılik «Sputnik V» vaktsınasynyń 300 myń dozasyn satyp alý týraly kelissózder júrgizýde.

Búgingi tańda Ázerbaıjanda halyqtyń shamamen 5%-y koronavırýsqa qarsy vaktsına aldy, bul shamamen 550 myń adam. Vaktsınatsııanyń tıimdiligi úshin oǵan táýekel tobyna kiretin azamattardyń keminde 70%-y qatysýy tıis.