Ázerbaıjanǵa barýdy josparlap otyrǵan qazaqstandyqtar neni bilýi tıis

BAKÝ. QazAqparat – Ázerbaıjanda karantın rejımi kezeń-kezeńimen jeńildetilýde, biraq kóptegen sheteldikter, sonyń ishinde Qazaqstan azamattaryna bul elge kirý úshin jekelegen talaptar mindetti bolyp qala beredi, dep habarlaıdy QazAqparat menshikti tilshisi.

Qazaqstan azamattary COVID-19-ǵa qarsy tolyq vaktsınalanǵanyn rastaıtyn tólqujaty, COVID-19-dan saýyǵyp shyqqany týraly resmı sertıfıkat nemese COVID-19 vaktsınatsııasyna qarsy kórsetilimder týraly sertıfıkaty bolǵan kezde ǵana Ázerbaıjanǵa áýe kóligimen bara alady. Aıta keterligi, bul qujattardyń elektrondyq rastaý atrıbýttary bolýy kerek jáne ony tek memleket berýi tıis. Bul qujattar áýejaıda tirkeýden ótý kezinde tekseriledi.

Qazaqstan azamattarynyń Qazaqstanǵa shyǵýy úshin vaktsınalaýdyń tolyq kýrsynan (vaktsınanyń 3 dozasy) ótkenin rastaıtyn qazaqstandyq vaktsınatsııa tólqujaty bolýy qajet. Basqa shet memlekettiń vaktsınatsııa tólqujaty bolǵan, vaktsına almaǵan nemese ekpeniń tek bir/eki dozasyn alǵan jaǵdaıda, koronavırýsqa tapsyrylǵan PTR-testiniń teris nátıjesi týraly qujatty usyný qajet.

Ayqtamada QR-kod bolǵany jón. Óıtkeni ol PTR testtiń nátıjeleri týraly tolyq aqparatty tezirek alýǵa múmkindik beredi. Osylaısha, QR kody bar anyqtamany usynatyn jolaýshylar shekaralyq baqylaýdan jyldam ótedi.

Koronavırýsqa tapsyrylǵan PTR-testtiń teris nátıjesi týraly anyqtamasy bar, biraq QR kody joq jolaýshylar qoldanystaǵy talaptarǵa sáıkes muqııat tekseristen ótedi.

Ázerbaıjannyń qurlyq shekaralary jabyq. Teńiz shekarasy arqyly Ázerbaıjanǵa Qazaqstan azamattarynyń mynadaı sanaty (COVID-19-ǵa qarsy tolyq vaktsınalanǵanyn rastaıtyn tólqujaty, COVID-19-dan saýyǵyp shyqqany týraly resmı sertıfıkat nemese COVID-19 vaktsınatsııasyna qarsy kórsetilimder týraly sertıfıkaty bolǵan kezde):

• Ázerbaıjan Mınıstrler kabıneti janyndaǵy Jedel shtab bergen arnaıy ruqsat negizinde;

• eger otbasy músheleri (jubaılary, ata-anasy, aǵa-inileri, ápke-sińlileri, balalary, áje-atasy nemese nemereleri), sondaı-aq týystyq baılanystary rastalǵan kezde mundaı jolaýshylardyń otbasy músheleri – olardyń jubaılary, ata-analary men balalary Ázerbaıjan azamattary bolsa;

• Ázerbaıjanda jumys isteýge ruqsaty barlar;

• Ázerbaıjanda turaqty nemese ýaqytsha turýǵa yqtııarhaty bar adamdar, sondaı-aq osy azamattardyń otbasy músheleri (ata-anasy, jubaıy nemese 18 jasqa deıingi balalary);

• Ázerbaıjan aýmaǵynda jaqyn týystary qaıtys bolǵan jaǵdaıda kire alady.