Ázerbaıjandyq kompanııalar «Ulttyq Onim-2020» kórmesine qatysýdy josparlap otyr
BAKÝ. QazAqparat – Ázerbaıjandyq kompanııalar Nur-Sultan qalasynda ótetin «Ulttyq Onim-2020» ulttyq ónimder kórmesine qatysyp, ózderiniń eksporttyq taýarlaryn usynbaq, dep habarlaıdy «QazAqparat» HAA tilshisi.
Ázerbaıjannyń eksporttyq ónimderi usynylatyn «Ultyq Onim-2020» kórmesine qatysý nıetin Ázerbaıjannyń Shaǵyn jáne orta bıznesti damytý agenttiginiń basqarma tóraǵasy Orhan Mamedov osy eldegi Qazaqstannyń elshisi Serjan Ábdikárimovpen kezdesý barysynda rastady.
Kezdesý barysynda ókilder ekijaqty taýar aınalymynyń kórsetkishin atap ótti. Osy salada áleýeti joǵary shaǵyn jáne orta bıznestiń yntymaqtastyǵyn arttyrý máseleleri talqylandy, sondaı-aq birlesip qyzmet etý jospary belgilendi.
Sonymen qatar dıplomat sheteldik ókildi Qazaqstanda 11 áýejaıda «ashyq aspan» rejıminiń engizilgeni týraly habardar etti. Bul tikeleı jáne tranzıttik jolaýshylar aǵynynyń ósýine, sondaı-aq Qazaqstannyń týrıstik áleýetin damytýǵa kómektesedi.
Kezdesý sońynda taraptar Orhan Mamedovtyń bıylǵy jyldyń mamyr aıynda Qazaqstanǵa sapary barysynda kelisken kelisimderdiń iske asyrylý barysy, Qazaqstan men Ázirbaıjan naryqtarynda eksporttyq ónimderdi arttyrý maqsatynda naqty is-sharalar men birlesken jobalar týraly áńgime qozǵady.
