Ázerbaıjandyq dáriger: Koronavırýstan saqtanýdyń jalǵyz joly – vaktsına saldyrý
BAKÝ. QazAqparat – Koronavırýstan saqtanýdyń jalǵyz joly - vaktsına saldyrý. Alańdaýǵa eshqandaı negiz joq. Baký saýyqtyrý ortalyǵynyń terapevt bóliminiń meńgerýshisi, ishki aýrýlar mamany Zakır Gýlıev osylaı dedi, dep habarlaıdy QazAqparat.
«Biz kúni boıy koronavırýs juqtyrǵan 30-40 adammen qarym-qatynas jasaǵan kezderimiz boldy. Osyǵan qaraı biz Ázerbaıjanǵa vaktsına jetkizilgenge deıin ábden qınaldyq. Óıtkeni meniń densaýlyǵyma qaýip tónip turǵan edi. COVID-19-ǵa qarsy vaktsına saldyrý tyǵyryqtan shyǵýdyń jalǵyz joly»,-deıdi dáriger.
Mamannyń sózinshe, oǵan vaktsınanyń birinshi dozasy 26 qańtarda salynǵan, taǵy bir doza 23 aqpanda salynbaq. Vaktsınanyń birinshi dozasy salynǵannan keıin eki kún boıy dárigerdiń bulshyqetteri azdap aýyrǵan. Degenmen onyń densaýlyq jaǵdaıy óte jaqsy.
Maman qazirgi tańda jumys istep jatqan mekemeniń qaýip tobyndaǵy kóptegen qyzmetkeri vaktsına alǵan. Olar aldymen ekpe alýdan birshama júreksingen. Abyroı bolǵanda vaktsına saldyrǵandardyń barlyǵynyń densaýlyq jaǵdaıy jaqsy.
Zakır Gýlıevtiń pikirinshe, koronavırýstan saqtanýdyń jalǵyz joly - vaktsına saldyrý.
«Meniń qalyń kópshilikke aıtarym, alańdaýǵa esh negiz joq. Ázerbaıjanda qoldanylyp jatqan «CoronoVAC» vaktsınasyn Qytaıdyń «SinoVac» kompanııasy jasap shyǵarǵan jáne ol kóptegen synaqtardan ótkizilip, tıimdiligi dáleldengen. Ár adam kezekpen vaktsına saldyrýy kerek»,-deıdi ishki aýrýlardy emdeıtin maman.
Ol sonymen qatar vaktsınanyń COVID-19 jańa shtamynan 100% qorǵamasa da vaktsına alǵandarda aýrý jeńil ótetnin aıtty.
«Enı klınıka» mekemesiniń dáriger-laboranty Nýralı Ismaılov ta vaktsınanyń birinshi dozasyn aldy jáne onyń da densaýlyq jaǵdaıy jaqsy.
«Vaktsına vırýstan saqtanýdyń jalǵyz joly, ol áýelden solaı. Dáriger retinde barlyǵyn vaktsına alýǵa shaqyramyn, ásirese qaýip tobyndaǵy azamattardy»,-dedi N.Ismaılov.
Aıta keteıik, Ázerbaıjanda Memlekettik shekara qyzmetiniń ókilderin vaktsınalaý jumystary bastaldy.
Serikbol Qoshmaǵambetov
