Ázerbaıjandyqtar EO-nyń Grýzııadaǵy keńsesi aldynda narazylyq aktsııasyn ótkizdi
Grýzııada turatyn ázerbaıjandyqtar Tbılısıde Eýropalyq Odaqtyń dıskrımınatsııalyq tájirıbesi men qos standarttarǵa qarsy mıtıng ótkizdi, dep habarlaıdy Kazinform tilshisi.
Narazylyq sharasy 28 qańtar kúni Tbılısıdegi Eýroodaq keńsesi aldynda ótti. Sherýshiler Ázerbaıjannyń aımaqtaǵy beıbitshilikti jaqtaıtynyn aıtty.
Aktsııa barysynda armıandardyń Grýzııa jurtshylyǵyna shyndyqty burmalap jetkizýge tyrysyp, shatastyrǵysy keletini aıtyldy.
Aktsııaǵa qatysýshylar Armenııadan Ázerbaıjanǵa qarsy lańkestik áreketti toqtatyp, Ázerbaıjanǵa mınalanǵan aýmaqtardyń kartasyn berýdi talap etti.
Sherýshiler eýropalyq ınstıtýttardyń Ázerbaıjanǵa qatysty qos saıasat ustanatynyn da málimdedi. Narazylyq aktsııasy ótetin jerge júzden astam polıtsııa qyzmetkeri jumyldyryldy.
Dál osy kúni Eýropadaǵy Ázerbaıjan áıelderiniń qaýymdastyǵy Gaagada narazylyq aktsııasyn ótkizdi. Uıym jetekshisi Maıssa Agamırzaeva halyqty qorǵaý úshin Ázerbaıjanǵa azat etilgen aýmaqtardyń naqty mına kartasyn berýdi talap etti.
Esterińizge sala keteıik, 27 qańtarda Ázerbaıjan mádenı ortalyqtarynyń ókilderi Shveıtsarııada BUU-nyń Jeneva keńsesi aldynda Armenııanyń azat etilgen jerlerge qoıǵan mınalar máselesine nazar aýdarý úshin narazylyq aktsııasyn ótkizgen bolatyn.
Buǵan deıin Armenııanyń jumys kanaldary arqyly ázerbaıjan jaǵyna mına alańdarynyń jańa kartalaryn beretini habarlanǵan. Armenııa Ázerbaıjan aýmaǵyndaǵy mına alańdary týraly 972 blankilerdi Ázerbaıjanǵa tapsyrǵan. Armıan tarapy onyń qaramaǵynda budan da joǵary sapaly kartalardyń joqtyǵyn jáne berilgen kartalar Qarabaq áskerı qyzmetkerleri arqyly alynǵanyn birneshe ret málimdegen.
