Ázerbaıjandyq úshem men qyrǵyzstandyq egizder Túrkistanda qazaq tilin úırenip júr
ASTANA. KAZINFORM — Qazaq tilin úırenýdi bastaǵandaryna nebári bir aı bolsa da, stýdentter erkin sóılep, óz oılaryn qazaq tilinde jetkize alady, dep habarlaıdy Ǵylym jáne joǵary bilim mınıstrliginiń baspasóz qyzmeti.
Qoja Ahmet ıAsaýı atyndaǵy Halyqaralyq qazaq-túrik ýnıversıtetinde 30 jyldan astam ýaqyt boıy Túrki elderinen kelgen jastar bilim alyp jatyr. Jyl saıyn oqý ordasyna qazaq tilin úırený úshin ártúrli elderden stýdentter keledi.
Bıyl ýnıversıtettiń Daıyndyq ortalyǵynda Ázerbaıjannan kelgen úshem — Zehra, Esra jáne Lala Azızovalar men Qyrǵyzstannan kelgen egizder — Batma jáne Zýýra Akkanalıevalar bilim alyp jatyr. Qazaq tilin úırenýdi bastaǵandaryna nebári bir aı bolsa da, tyńdaýshylar erkin sóılep, óz oılaryn qazaq tilinde jetkize alady. Daıyndyq ortalyǵynda oqý ordanyń ishki granty negizinde Túrki memleketterinen kelgen jastar bilim alyp, qazaq tilimen qatar túrik jáne aǵylshyn tilderin de meńgeredi.
— Qazaqstanda joǵary bilim alýdy tańdaýymyzǵa birneshe sebep bar. Eń bastysy — túrki elderinen kelgen stýdenttermen tanysyp, ortaq mádenıetimiz ben tarıhymyzdy tereńirek tanyǵymyz keldi. Sondaı-aq túrki áleminiń rýhanı astanasy — Túrkistan qalasynda bilim alý biz úshin úlken mártebe, — deıdi stýdentter.
Oqytýshylardyń aıtýynsha, bilim alýshylardyń jańa tilderdi úırenýge degen qyzyǵýshylyǵy men yntasy joǵary. Úshem men egiz qyzdar Daıyndyq ortalyǵyn aıaqtaǵannan keıin óz qalaýyna saı mamandyqtar boıynsha bilimin jalǵastyrýdy josparlap otyr.
— Bizdiń túr-sıpatymyz uqsas bolǵanymen, tańdaǵan mamandyǵymyz ártúrli. Birimiz — psıholog, birimiz — dáriger, endi birimiz muǵalim bolǵymyz keledi, — deıdi úshem.
Aıta keteıik, Qoja Ahmet ıAsaýı atyndaǵy Halyqaralyq qazaq-túrik ýnıversıtetiniń Daıyndyq ortalyǵynda qazirgi tańda túrki memleketterinen kelgen 296 tyńdaýshy bar. Olar bir jyl kóleminde tildik daıyndyqtan ótip, qorytyndy emtıhan nátıjesinde tańdaǵan mamandyǵy boıynsha oqýyn jalǵastyrady.
Osyǵan deıin qazaq tiliniń tsıfrlyq kommýnıkatsııa tili retinde damýyn qamtamasyz etetin zań qabyldanǵanyn jazǵan edik.