Ázerbaıjandyq saıasattanýshy Qazaqstandaǵy ombýdsmen ınstıtýtynyń múmkindikterin atady
ASTANA. KAZINFORM — Qazaqstanda Adam quqyqtary jónindegi ýákil ınstıtýtynyń róli, onyń ishinde óńirlerdegi ókilder jelisiniń damýyna baılanysty kúsheıip keledi. Bul týraly «Ońtústik Kavkaz» saıasattanýshylar klýbynyń jetekshisi Ilgar Velızade málimdedi.
Saıasattanýshy negizgi ózgeristerdiń biri retinde 2022 jyly qabyldanǵan zańdy atady. Onyń pikirinshe, bul qujat Adam quqyqtary jónindegi ýákildiń jumysyna jańa tásil qalyptastyrýǵa negiz bolyp, memlekettik organdarmen ózara is-qımyl barysynda ınstıtýttyń múmkindikterin keńeıtti.
— Eń aldymen, bul zań ombýdsmenniń Qazaqstan azamattarynyń konstıtýtsııalyq quqyqtary men bostandyqtaryn iske asyrýǵa qatysty máselelerdi memlekettik organdar aldyna qoıý jáne olardyń oryndalýyn talap etý quqyǵyn ınstıtýtsıonaldyq turǵydan bekitti, — dedi Velızade.
Saıasattanýshy ombýdsmenniń óńirlerdegi ókilderiniń jumysyna da jeke toqtaldy. Onyń aıtýynsha, olar jergilikti jerlerdegi búkil júıeniń mańyzdy býyny sanalady.
— Óńirlik ombýdsmenderdiń róli óte mańyzdy. Bul júıeniń jańa jaǵdaılarda qanshalyqty tıimdi ári azamattardyń máselesine qanshalyqty sezimtal jumys isteıtini olardyń qyzmetine baılanysty, — dep atap ótti saıasattanýshy.
Velızadeniń pikirinshe, ombýdsmenniń túrli ınstantsııadaǵy sottarmen jáne quqyq qorǵaý organdarymen ózara is-qımyly da mańyzdy. Bul azamattarǵa óz quqyqtaryn qorǵaý jáne konstıtýtsııalyq quqyqtarynyń iske asýyna qol jetkizý úshin qosymsha múmkindik beredi.
Saıasattanýshy ombýdsmen ınstıtýtyndaǵy ózgeristerdi sońǵy jyldardaǵy saıası reformalar aıasynda qarastyrady. Onyń aıtýynsha, bul reformalar memlekettik ınstıtýttardy jetildirýge jáne bılik pen qoǵam arasyndaǵy dıalogty nyǵaıtýǵa baǵyttalǵan.
«Halyq únine qulaq asatyn memleket» tujyrymdamasy
Ilgar Velızade «Halyq únine qulaq asatyn memleket» tujyrymdamasyna da toqtaldy. Onyń sózinshe, tujyrymdamanyń negizgi baǵyttarynyń biri — adam quqyqtaryn qamtamasyz etý.
— Qazaqstan Prezıdenti el taǵdyryna qatysty mańyzdy sheshimder qabyldaý kezinde qalyń buqaranyń múddesin eskerýdiń qajettiligine nazar aýdarady. Sonymen qatar azamattardyń quqyqtary men mindetterine, ásirese jergilikti jerlerde, muqııat qaraý kerek ekenin de biledi, — dedi Velızade.
Sarapshy ombýdsmen ınstıtýtyn odan ári jetildirýdi memlekettik basqarý júıesin damytý úderisimen baılanystyrady.
— Ombýdsmen ınstıtýtyn jetildirý memlekettik basqarý tájirıbesin jetildirýmen qatar, „Halyq únine qulaq asatyn memleket“ tujyrymdamasyn ǵana emes, Qazaqstan qoǵamynyń aldaǵy jyldardaǵy damý tujyrymdamasyn da iske asyrýdyń kepili, — dep qorytyndylady Ilgar Velızade.
