Ázerbaıjandar «Qaraly qańtar» qurbandaryn eske aldy

ASTANA. QazAqparat - H.Dosmýhamedov atyndaǵy Atyraý memlekettik ýnıversıtetinde «Novrýz» ázerbaıjan etnomádenı birlestigi 1990 jyldyń 20 qańtary kúni Bakýde bolǵan oqıǵalarǵa qatysty Ázerbaıjandaǵy Búkilhalyqtyq aza tutý kúnine arnalǵan is-shara ótkizdi, dep habarlaıdy QHA saıty.

Іs-sharaǵa oblystyq Qazaqstan halqy Assambleıasy hatshylyǵynyń basshysy G.Shákirova, «Qoǵamdyq kelisim» KMM-niń basshysy T.Aman-Týrlına jáne  etnomádenı birlestikterdiń basshylary men músheleri  qatysty.

Osydan jıyrma jeti jyl buryn keńestik memlekettiń áskerı mashınasy Bakýde ulttyq erkindik pen óz eliniń aýmaqtyq tutastyǵy úshin jınalǵan beıbit halyqty qatigezdikpen basyp, kóptegen adamnyń ólimine sebepshi bolǵan. Alaıda ol ázirbaıjan halqynyń erik-jigerin, óz táýelsizdigine degen umtylysyn toqtata almady. Bul oqıǵalar  Ázerbaıjan tarıhyna  «Qaraly qańtar» degen ataýmen endi.

1990 jyldyń 20 qantarynda erlikpen qaza tapqan azamattarǵa arnalyp Baký qalasynyń Taýly saıabaǵynda Batyrlar alleıasy quryldy. Bul kún Ázirbaıjanda totalıtarlyq rejimniń qurbandaryn eske alý kúni bolyp jarııalandy. Jyl saıyn el astanasynyń myńdaǵan turǵyndary osy oqıǵalardyń qurbandaryn eske alyp memorıalǵa gúl shoqtaryn qoıýǵa keledi.

Atyraý oblysynyń Qazaqstan halqy Assambleıasy hatshylyǵynyń basshysy G.Shákirova, «Qoǵamdyq kelisim» KMM-niń basshysy T.Aman-Týrlına, «Vaınah» sheshen-ıngýsh etnomádenı birlestiginiń tóraǵasy Z.Zýbarıev óz sózderinde qańtardaǵy qantógis ortaq qaıǵy ekenin atap ótti.   

1990 jyly Bakýde bolǵan «qaraly qańtar» tragedııasy 1986 jyly Almatyda, 1989 jyly Tbılısıde bolǵan qandy oqıǵalardyń jalǵasy bolyp tabylady.