Azerbaıjandaǵy parlament saılaýynda bıliktegi partııa jeńiske jetti

BAKÝ. QazAqparat - Azerbaıjandaǵy parlamenttik saılaýda aldyn ala málimetterge qaraǵanda, saılaýshylardyń 55,7 paıyzy daýys bergen (2897188 saılaýshy), al daýystyń kópshiligin bıliktegi «Enı Azerbaıdjan» partııasy alyp, ózderiniń jeńisi jaıly málimdedi.

Daýys bergenderdiń sany týraly OSK «Saılaý» aqparattyq ortalyǵynyń basshysy Rýfat Gıýlmamedov aıtty.

1 qarasha kúni keshke bıliktegi «Enı Azerbaıdjan» partııasynyń atqarýshy hatshysy A.Ahmedov, aldyn ala derekter boıynsha partııanyń basymdyqpen jeńiske jetkendigin málim etti. Partııa parlamenttegi 125 orynnyń keminde 70-in alýdy kózdep otyr. Munyń ústine exit-poll derekteri de Ahmetovtiń aıtqandaryn rastaıdy.

Eske sala ketsek, Azerbaıjandaǵy bir palataly parlamenttke 767 kandıdat úmitker. OSK málimetterine qaraǵanda, Azerbaıjandaǵy saılaýǵa 40 sheteldik uıymnyń atynan 503 halyqaralyq baıqaýshylar kelgen. TMD eń kóp baıqaýshylar mıssııasyna ıe -150 adam. Saılaý barysyn 66 myńnan astam jergilikti baıqaýshylar qadaǵalady.