Ázerbaıjandaǵy saılaý: Jaqyp Asanov TMD PAA baıqaýshylar tobynyń úılestirýshisi bolyp taǵaıyndaldy
BAKÝ. KAZINFORM - Ázerbaıjan Respýblıkasy Mıllı Mejlısiniń (parlamentiniń) tóraǵasy Sahıba Gafarovanyń shaqyrýymen TMD-ǵa múshe memleketterdiń Parlamentaralyq Assambleıasynyń halyqaralyq baıqaýshylar toby Ázerbaıjandaǵy kezekten tys prezıdenttik saılaýdy baqylaýǵa qatysyp jatyr. Bul týraly seısenbide TMD Parlamentaralyq Assambleıasy keńesiniń hatshylyǵy málim etti, dep habarlaıdy Trend.
Hatshylyqtyń málimdemesinde kórsetilgendeı, akkredıtteýden ótken baıqaýshylar tobynyń quramynda Belarýs, Qazaqstan, Qyrǵyzstan, Reseı, Tájikstan jáne Ózbekstan depýtattary men senatorlary bar. TMD Parlamentaralyq Assambleıasy baqylaýshylar tobynyń úılestirýshisi bolyp Qazaqstan Respýblıkasy Parlamenti Senaty tóraǵasynyń orynbasary Jaqyp Asanov taǵaıyndaldy.
Top quramynda TMD Parlamentaralyq Assambleıasy Keńesiniń Bas hatshysy Dmıtrıı Kobıtskıı bastaǵan assambleıanyń laýazymdy tulǵalary da bar.
Baıqaýshylar 4 aqpanda Ázerbaıjanda qysqa merzimdi monıtorıng júrgizýdi bastaıdy. 4-6 aqpanda kandıdattardyń saılaýaldy shtabtarymen, Ortalyq saılaý komıssııasynyń, Bas prokýratýranyń, Konstıtýtsııalyq sottyń jáne Mıllı Mejlısiniń basshylyǵymen kezdesýler ótedi dep josparlanǵan.
7 aqpanda TMD Parlamentaralyq Assambleıasynyń halyqaralyq baıqaýshylary Bakýdegi jáne Ázerbaıjannyń basqa da aımaqtaryndaǵy saılaý ýchaskelerine barady. Sheteldik ýchaskelerde de monıtorıng uıymdastyrylady.
Eske sala keteıik, Ázerbaıjan prezıdentiniń kezekten tys saılaýy 7 aqpanda ótedi.
Buǵan deıin Ázerbaıjanda kezekten tys prezıdenttik saılaýǵa baılanysty kandıdattardyń saılaýaldy úgit-nasıhat kezeńi bastalǵany habarlanǵan bolatyn. Onyń merzimi 6 aqpan kúni saǵat 08:00-de aıaqtalady.
OSK kezekten tys prezıdenttik saılaýda 7 kandıdatty tirkedi:
1.Bıliktegi «Enı Ázerbaıjan» partııasynan prezıdenttikke kandıdat jáne qazirgi memleket basshysy Ilham Álıev;
2.Ózin-ózi usynǵan kandıdat Zahıd Orýdj;
3.«Ulttyq maıdan» partııasynan prezıdenttikke kandıdat Razı Nýrýllaev;
4.«Uly jasampazdyq» partııasynan prezıdenttikke kandıdat Fazıl Mustafa;
5.«Uly Ázerbaıjan» partııasynan prezıdenttikke kandıdat Elshad Mýsaev;
6.«Birtutas Ázerbaıjan halyqtyq maıdany» partııasynan prezıdenttikke kandıdat Gýdrat Hasangýlıev;
7.Ózin-ózi usynǵan kandıdat Fýad Álıev.
