Ázerbaıjandaǵy prezıdent saılaýy: daýys berý bastaldy

ASTANA. KAZINFORM - Ortalyq saılaý komıssııasynyń (OSK) tóraǵasy Mazahır Panahov saılaý ýchaskelerin daýys berý úshin ashyq dep jarııalady.

El prezıdenttigine úmitkerler arasynda «Enı Ázerbaıjan» partııasynan Ilham Álıev, ózin-ózi usynǵan kandıdattar Zahıd Orýdj jáne Fýad Álıev, «Ulttyq maıdan» partııasynan Razı Nýrýllaev, «Uly jasampazdyq» partııasynan Fazıl Mustafa, «Uly Ázerbaıjan» partııasynan Elshad Musaev, «Ázerbaıjan Birikken Halyqtyq maıdany» partııasynan Gýdrat Hasangýlıev bar.

OSK hatshylyǵynyń Aqparat ortalyǵy daýys berý barysy men onyń qorytyndylary týraly aldyn ala málimetterdi saǵat 10:00, 12:00, 15:00, 17:00 jáne 19:00-de usynady. 

Saılaýshylar tiziminde 6 mln 478 myń 623 adam bar. Olar el boıynsha 6 537 saılaý ýchaskesinde daýys beredi. Ázerbaıjandaǵy saılaýdy 190 halyqaralyq medıa qurylym ókilderi baqylaıdy.

Saılaý ýchaskeleri kabınalarmen, úgit materıaldarymen, saılaýshylardyń tizimderi bar aqparat taqtalarymen, statsıonarlyq jáne tasymaldanatyn jáshiktermen, tirkeý kitaptarymen, Saılaý kodeksimen, saılaýǵa qatysty nusqaýlyqtarmen jabdyqtalǵan.

Jańashyldyq retinde saılaý ýchaskeleri qaıta daýys berýdi boldyrmaý úshin saılaýshylardyń saýsaqtaryna tússiz sııamen tańbalaý arqyly azamattardy elektrondy sáıkestendirýdi paıdalanady. Budan basqa, daýys berý kúnindegi protsesterdi jedel baqylaý úshin saılaý ýchaskelerinde myńǵa jýyq veb-kamera ornatylǵan, olardy OSK saıtynan baqylaýǵa bolady. 

Ázerbaıjanda buǵan deıin prezıdent saılaýy 2018 jyldyń 11 sáýirinde ótti.