Ázerbaıjanda jemqorlyq týraly habarlaǵan azamattarǵa syıaqy tólenýi múmkin
ASTANA. KAZINFORM — Ázerbaıjanda sybaılas jemqorlyq quqyq buzýshylyqtary týraly habarlaıtyn azamattarǵa qosymsha kepildikterdi zań júzinde bekitý usynyldy, dep habarlaıdy Kazinform agenttiginiń Bakýdegi menshikti tilshisi.
Tıisti normalar «Sybaılas jemqorlyqqa baılanysty quqyq buzýshylyqtar týraly habarlaıtyn adamdardy yntalandyrý jáne qorǵaý týraly» zań jobasynda qarastyrylǵan.
Qujat Ázerbaıjan Mıllı Medjlısiniń (parlament) qorǵanys, qaýipsizdik jáne sybaılas jemqorlyqpen kúres máseleleri jónindegi, sondaı-aq quqyqtyq saıasat jáne memlekettik qurylys jónindegi komıtetteriniń birlesken otyrysynda talqylanyp jatyr.
Zań jobasyna sáıkes, ótinish berýshiler óz derekteriniń qupııa saqtalýyn, ózin jáne jaqyn týystaryn qorǵaýdy, sondaı-aq zańsyz qysym men ádiletsiz qarym-qatynastyń aldyn alýdy talap ete alady.
Budan bólek, memleket olarǵa kásibı zań kómegin kórsetýdi, sot shyǵyndarynan bosatýdy, sondaı-aq materıaldyq jáne moraldyq zııandy óteýdi qamtamasyz ete alady. Sonymen qatar qupııa keńes alý múmkindigi qarastyrylǵan.
Qorǵaý sharalaryn iske asyrýǵa zań jobasynda belgilengen memlekettik organdar men mekemeler jaýapty bolady.
Buǵan deıin Ázerbaıjanda 1 qazannan bastap tutynýshylyq nesıeni qashyqtan rásimdeý jáne kredıttik lımıtti ulǵaıtýǵa qatysty jańa talaptar kúshine enetini belgili boldy.
