Ázerbaıjanda jasandy ıntellektiniń óńirlik ortalyǵy qurylady
ASTANA. KAZINFORM — Ázerbaıjanda Ortalyq Azııa men Taıaý Shyǵys elderine baǵyttalǵan jasandy ıntellekt salasyndaǵy óńirlik ozyq tájirıbe ortalyǵy qurylady. Bul týraly Kazinform agenttiginiń Bakýdegi menshikti tilshisi habarlaıdy.
Tıisti memorandýmǵa Ázerbaıjannyń Innovatsııalar jáne tsıfrlyq damý agenttigi (İRİA) men halyqaralyq Polygraf AI startapy qol qoıdy.
Yntymaqtastyq aıasynda Bakýde jasandy ıntellekt sheshimderin ázirleý jáne engizý platformasy qurylyp, tehnologııalar, ınjenerııa jáne kıberqaýipsizdik salalarynda jergilikti mamandar komandasy jasaqtalady.
Taraptar jasandy ıntellekt, mashınalyq oqytý, derekterdi qorǵaý jáne kıberqaýipsizdik baǵytyndaǵy kadrlyq áleýetti damytýdy kózdep otyr. Tehnoparkter men joǵary oqý oryndarynyń qatysýymen bilim berý baǵdarlamalary, taǵylymdamalar jáne tájirıbe almasý bastamalary uıymdastyrylady.
Sonymen qatar, jasandy ıntellekt qaýipsizdigi, derbes derekterdi qorǵaý, jalǵan jáne sıntetıkalyq kontentti anyqtaý baǵytynda birlesken jobalar júzege asyrylady. Ázerbaıjanda memlekettik jáne jeke sektorǵa arnalǵan pılottyq tehnologııalyq jobalar men qoldanbaly zertteýler de iske qosylady.
Yntymaqtastyq Ázerbaıjannyń 2025–2028 jyldarǵa arnalǵan jasandy ıntellekt strategııasyna jáne 2026–2028 jyldarǵa arnalǵan tsıfrlyq damýdy jedeldetý jónindegi is-qımyl josparyna sáıkes júzege asyrylady.
Sondaı-aq taraptar ázerbaıjandyq tsıfrlyq sheshimderdi halyqaralyq naryqtarǵa, onyń ishinde Afrıka elderiniń naryǵyna shyǵarýǵa yqpal etýdi josparlap otyr.
Buǵan deıin Bakýde ótken Túrki áleminiń halyqaralyq ınjenerlik sammıtinde ortaq tehnologııalyq beldeý qurý bastamasy kóterilgen bolatyn.
