Ázerbaıjanda jappaı vaktsınalaý bastaldy

BAKÝ. QazAqparat – 10 mamyrdan bastap Ázerbaıjanda 18 jastan asqan azamattardy jappaı vaktsınalaý bastalady. Bul týraly Densaýlyq saqtaý mınıstriniń birinshi orynbasary Teımýr Musaev ÁR Mınıstrler kabıneti janyndaǵy jedel shtabtyń kezekti brıfıngi barysynda málimdedi, dep habarlaıdy QazAqparat.

Mınıstrdiń orynbasarynyń aıtýynsha, Ázerbaıjan koronavırýsqa qarsy vaktsınalardyń barlyq óndirýshisimen preparatty elge turaqty ákelinýin qamtamasyz etý maqsatynda kelissózderdi jalǵastyrýda. Búgingi tańda elde tek CoronaVac, Vaxzevria sııaqty qaýipsiz jáne tıimdi vaktsınalar qoldanylady, jaqynda «Spýtnık V» partııasy jetkizildi.

Densaýlyq saqtaý mınıstrligi ókiliniń aıtýynsha, búginde Ázerbaıjanda 600 myń adam vaktsınanyń ekinshi dozasyn aldy.

«Vaktsınanyń eki dozasyn alǵan azamattar arasynda aýyrǵandar sany óte tómen, al koronavırýs juqtyrǵandar aýrýdyń aýyr túrinen qorǵalǵan», – dedi Musaev.

Sondaı-aq Ázerbaıjan Parlamentiniń depýtaty A. Badamov eldegi vaktsınalaýdyń salystyrmaly túrde tómen qarqynyn dári-dármekterdiń jetispeýshiligimen emes, ony nasıhattaý boıynsha tıisti jumystyń joqtyǵymen baılanystyrady.

Osy ýaqytqa deıin Ázerbaıjanda 1,4 mıllıon doza vaktsına qoldanylyp, el halqynyń 14%-y egildi. Respýblıkada koronavırýs juqtyrǵandar sany birtindep tómendeýde, bul jalpy oń qarqyndy kórsetedi.

Avtory Serikbol Kóshmaǵanbetov