Ázerbaıjanda zańsyz qumar oıyn bıznesine jaýapkershilikti kúsheıtý josparlanyp otyr
ASTANA. KAZINFORM - Ázerbaıjanda zańsyz qumar oıyndaryn uıymdastyrý jáne ótkizý úshin qylmystyq jaýapkershilikti kúsheıtý usynyldy. Tıisti ózgerister Qylmystyq kodekske engiziletin túzetýler jobasynda qarastyrylǵan, dep habarlaıdy Kazinform agenttiginiń Bakýdegi menshikti tilshisi.
Qujatqa sáıkes, quqyqbuzýshylyqty qaıtalap jasaý, kámeletke tolmaǵandardy qumar oıyndarǵa tartý, sondaı-aq zańsyz qyzmetten eleýli, iri nemese asa iri kólemde tabys tabý jaǵdaılarynda qatań jaza qoldanylady.
Túzetýlerde zamanaýı tsıfrlyq tehnologııalardy, sonyń ishinde ınternet jelisin, uıaly baılanysty, áleýmettik jeli platformalaryn, elektrondyq baılanys quraldaryn jáne mobıldi qosymshalardy paıdalaný arqyly qumar oıyndaryn uıymdastyrǵany úshin jaýapkershilikti kúsheıtý kózdelgen.
Budan bólek, aldyn ala sóz baılasqan adamdar tobynyń qylmys jasaýy, kámeletke tolmaǵandardy qumar oıyndarǵa qatystyrýy jáne zańsyz áreketten eleýli tabys tabýy jaýapkershilikti aýyrlatatyn mán-jaılar retinde qarastyrylady.
Mundaı jaǵdaılarda kinálilerge qylmys nátıjesinde alynǵan tabystyń eki esesine deıin aıyppul salý, ne eki jyldan tórt jylǵa deıin bas bostandyǵyn shekteý nemese sol merzimge bas bostandyǵynan aıyrý jazasy taǵaıyndalýy múmkin.
Uıymdasqan top nemese qylmystyq qaýymdastyq jasaǵan qylmystar, sondaı-aq iri kólemde tabys tabý jaǵdaılarynda budan da qatań jaza qarastyrylǵan. Mundaı jaǵdaıda úsh jyldan bes jylǵa deıin bas bostandyǵyn shekteý nemese aıyrý usynylady.
Negizgi jańashyldyqtardyń biri — aıyppul belgileý tártibiniń ózgerýi. Qoldanystaǵy zańnamada aıyppul mólsheri 6 myńnan 9 myń AQSh dollaryna deıin belgilense, túzetýler qabyldanǵannan keıin onyń kólemi zańsyz jolmen alynǵan tabysqa tikeleı baılanysty bolady jáne zańsyz tabystyń eki esesine deıin jetýi múmkin.
Sondaı-aq zań jobasynda qumar oıyndaryn ótkizý oryndaryn qaıtadan uıymdastyrǵany nemese ustaǵany, kámeletke tolmaǵandardy oǵan tartqany jáne eleýli, iri nemese asa iri tabys tapqany úshin jaýapkershilikti kúsheıtý qarastyrylǵan.
Kútilip otyrǵan ózgerister zańsyz oıyn bıznesimen kúrestiń tıimdiligin arttyryp, kámeletke tolmaǵandardy qorǵaýǵa jáne tsıfrlyq platformalardy zańsyz maqsatta paıdalanýdyń jolyn kesýge yqpal etedi.
Aıta keteıik, osyǵan deıin eldegi uıaly baılanys operatorlary zańsyz oıyn bıznesindegi qarjy aǵyndaryn baqylaýǵa alǵan bolatyn.
