Ázerbaıjanda vaktsına alǵandardyń qaıtyp koronavırýs juqtyrý jaǵdaıy bolǵan joq – ǴZI basshysy
BAKÝ. QazAqparat – Ázerbaıjanda myńdaǵan medıtsına qyzmetkeri vaktsına alyp, eshqaısysy da densaýlyq jaǵdaıyna shaǵymdanǵan joq. Bul týraly Velı Ahýndov atyndaǵy medıtsınalyq profılaktıka ǵylymı-zertteý ınstıtýtynyń dırektory Adıl Allahverdıev málim etti, dep habarlaıdy QazAqparat.
A. Allahverdıevtiń sózinshe, vaktsınalardyń barlyǵynyń da jetilmegen jaqtary bolýy múmkin. Sondaı-aq, olar júıeli jáne naqty bir máselege baılanysty bolady.
«Júıeli túrdegi janama áserleri - dene qyzýy, álsizdik, bulshyqet aýyrýy jáne t.b. Jergilikti áser - bul vaktsına egilgen jerdegi qyzarý, aýyrsyný. Qazirdiń ózinde 60 myńnan astam medıtsına qyzmetkeri vaktsına aldy. Baqylaý jumystary kórsetkendeı, adamdarda kúrdeli asqynýlar baıqalmaǵan. Men ózim vaktsına aldym. Dostarym sııaqty eshqandaı shaǵymym joq», - dedi ǵylymı-zertteý ınstıtýtynyń basshysy.
Dáriger Túrkııada da, Ázerbaıjanda da vaktsına alǵandar arasynda koronavırýsty qaıta juqtyrý jaǵdaılary bolmaǵanyn atap ótti. Búgingi kúnge deıin Ázerbaıjanda qoldanylatyn «Coronovac» vaktsınasynyń tıimsizdigi týraly eshqandaı aqparat joq.
A.Allahverdıev budan buryn aıtqanyndaı, Ázerbaıjanǵa jetkizilgen qytaılyq «Coronavac» vaktsınasy joıylǵan COVID-19 vırýsynan jasalǵan.
«Bul vaktsınanyń eń úlken artyqshylyǵy - ekpeden keıingi kez-kelgen aýrý belgileriniń baıqalmaýynda. Taǵy bir artyqshylyǵy - vaktsınany saqtaýǵa yńǵaıly», - dep sendirdi sarapshy.
Ázerbaıjan Mınıstrler Kabıneti janyndaǵy Jedel shtabtyń málimeti boıynsha, ótken táýlikte elde taǵy 191 adam koronavırýs ınfektsııasyn juqtyrǵan. 226 adam saýyǵyp ketkenimen, 3 adam qaıtys bolǵan. Búgingi kúnge deıin elde koronavırýs juqtyrǵan 231 840 adam tirkeldi. Onyń 3173-i qaıtys boldy.
Avtory: Serikbol Qoshmaǵambetov
Foto: trend.az
