Ázerbaıjanda týysqan adamdardyń bir-birine úılenýine tyıym salyndy
ASTANA. KAZINFORM – Ázerbaıjannyń Mıllı májilisi 2024 jyldyń 28 maýsymynda Otbasy kodeksine jaqyn týystar arasynda qıylatyn nekege tyıym salatyn ózgeristerdi engizdi.
TASS agenttiginiń málimetinshe, Kodeks baptaryna tómendegideı eki tarmaq qosylǵan:
- bıologııalyq atasy nemese ájesi ortaq, bir kindikten taraǵan baýyrlardyń balalary arasyndaǵy odaqtarǵa tyıym salý;
- bıologııalyq týystyǵy bar nemere aǵalar men nemere ápkeler arasyndaǵy nekege tyıym salý.
Sondaı-aq, Otbasylyq kodeksten dáleldi sebepter bolǵan jaǵdaıda nekege turǵysy keletin kámeletke tolmaǵandar úshin neke jasyn bir jylǵa tómendetý týraly tarmaq alynyp tastaldy.
«Kóp jaǵdaıda qoldanystaǵy bul zańnamalyq norma kámeletke tolmaǵandardyń quqyqtary men bostandyqtarynyń shektelýine ákelip soǵyp jatady, óıtkeni dáleldi sebepter qandaı krıterııler boıynsha anyqtalatyny anyq kórsetilmegen», – dep túsindirdi Ázerbaıjan Parlamenti.
Aıta keteıik, Ázerbaıjandaǵy nekelesýge 18 jasqa tolǵanda ǵana ruqsat beriledi.
