Ázerbaıjanda Toplum TV jýrnalısteri 15 jylǵa deıin bas bostandyǵynan aıyryldy
ASTANA. KAZINFORM – Ázerbaıjan soty táýelsiz Toplum TV basylymynyń toǵyz jýrnalısine úkim shyǵardy. Eldegi jemqorlyq týraly zertteýlerimen tanylǵan basylymnyń eki negizin qalaýshysy 15 jylǵa bas bostandyǵynan aıyryldy, dep habarlaıdy BBC.
Sot sheshimimen Toplum TV negizin qalaýshylardyń biri Akıf Gýrbanov pen Rýslan Izzetlı 15 jylǵa sottaldy. Beınematerıaldar redaktory Mýshfıg Djabbarov pen joba úılestirýshileri Ilkın Amrahov jáne Ramıl Babaev 13 jyldan, jýrnalısterdi daıarlaýmen aınalysqan Alı Zeınalov pen Toplum TV negizin qalaýshy Alesker Mamedlı 14 jyldan, tilshi Farıd Ismaılov pen SMM-menedjer Elmır Abbasov 12 jyldan bas bostandyǵynan aıyryldy.
Mamedlıdiń eldegi buqaralyq aqparat quraldary salasynyń belgili zańgeri ekeni jáne qazirgi ýaqytta aýyr dertke shaldyqqany aıtyldy.
Toplum TV Ázerbaıjan mınıstrlikterindegi, sheneýnikter men olardyń otbasy músheleri arasyndaǵy jemqorlyqqa qatysty zertteý materıaldarymen tanymal. Basylym sondaı-aq el ekonomıkasynyń naqty jaǵdaıy, tsenzýra jáne áleýmettik máseleler týraly turaqty jarııalap keledi.
Basylymnyń jeke saıty men YouTube arnasy jumys isteıdi. Qazir arnanyń 100 myńǵa jýyq jazylýshysy bar. Redaktsııa quramy ózgergenimen, Toplum TV qyzmetin jalǵastyryp jatyr.
2024 jylǵy naýryzda Ázerbaıjan polıtsııasy basylymnyń keńsesinde tintý júrgizip, ony mórlep japqan jáne redaktsııa qyzmetkerleriniń basym bóligin qamaýǵa alǵan.
Eki jyl buryn qabyldanǵan buqaralyq aqparat quraldary týraly zań Ázerbaıjanda baspasózdiń shetelden qarjylandyrylýyna tolyq tyıym saldy. Sonyń negizinde Toplum TV qyzmetkerlerine, sondaı-aq basqa da táýelsiz BAQ ókilderine aqsha kontrabandasy boıynsha aıyp taǵyldy. Keıin bul aıyptarǵa zańsyz kásipkerlikpen aınalysý, aqshany jylystatý, salyq tóleýden jaltarý jáne qujattardy qoldan jasaý baptary qosyldy.
Eýropa keńesi Parlamenttik assambleıasy qabyldaǵan qararda Toplum TV jýrnalısterine qatysty qýdalaý «Ázerbaıjandaǵy synshyl pikirlerdiń únin óshirý» dep baǵalanǵan.
Aıta keteıik, buǵan deıiýn Ulybrıtanııada jumysqa ornalastyramyn dep 10 adamdy aldaǵan astanalyqqa úkim shyqty.
