Ázerbaıjanda teńizdegi qubyrdan aǵyp ketken munaı toqtatyldy
ASTANA. KAZINFORM — Ázerbaıjan elindegi Dıýbendı jaǵalaýyna munaıdyń jaıylý sebebi anyqtalyp, jedel túrde joıyldy. Munaı «Azneft» óndiristik birlestiginiń teńiz astyndaǵy qubyrynan aqqan. Bul týraly AZERTAC agenttigi habarlady.
AZERTADJ málimetinshe, 19 maýsym kúni «Azneft» óndiristik birlestiginiń tıisti qyzmetterine Dıýbendı jaǵajaıy mańynda munaı izderi baıqalǵany týraly aqparat túsken.
Alǵashqy tekserý barysynda Pırallahy araly men Dıýbendı kenti arasyndaǵy teńiz aýmaǵynda keme men avıatsııa kómegi arqyly munaı daǵy anyqtaldy.
Bastapqy kezeńde aǵyp jatqan jer birden baıqalmaǵandyqtan, mamandar lastanýdyń birneshe yqtımal sebebin qarastyrǵan.
Keıingi dıagnostıkalyq tekserý nátıjesinde munaıdyń teńiz astyndaǵy «Azneftke» tıesili qubyrlardyń birinen shyqqany belgili boldy.
Apat kózi anyqtalǵannan keıin osy baǵyttaǵy munaı tasymaly dereý toqtatylyp, saldaryn joıý úshin jedel shtab quryldy.
Súńgýirler júrgizgen tekserý kezinde qubyrdyń zaqymdanǵany anyqtaldy. Aldyn ala málimet boıynsha, zaqym syrtqy áserden, boljam boıynsha keme zákirinen bolýy múmkin.
Jóndeý jumystary aıaqtalǵanǵa deıin zaqymdanǵan bólik qoldanystan shyǵaryldy. Bul munaıdyń odan ári aǵýyna jol bermeıdi.
Qazir Ázerbaıjannyń Tótenshe jaǵdaılar mınıstrligi men «Azneft» teńiz aýmaǵy men jaǵalaý syzyǵyn tazartý jumystaryn júrgizip jatyr.
Osyǵan deıin Ázerbaıjannyń Japonııaǵa alǵashqy munaı tıegen tankerin jibergeni týraly jazdyq.
