Ázerbaıjanda Tax Free júıesi engiziledi
Ázerbaıjanǵa kelgen sheteldikter qarjysyn únemdeý úshin satyp alý kezinde Tax Free júıesiniń múmkindikterin paıdalanyp, tólengen aqshanyń bóligin qaıtaryp ala alady.
Bul týraly Ázerbaıjan Salyq mınıstrligi habarlady.
«Tıisti qujattar bekitýge usynyldy, qazirgi ýaqytta kórsetilgen júıe testtik rejimde jumys isteıtin bolady», - dep málimdedi mınıstrlikte.
Tax Free - taýarǵa tólengen, sheteldik azamat satyp alǵan, kommertsııalyq jáne óndiristik maqsatqa arnalmaǵan qosymsha qunǵa (QQS) salyqty qaıtarý tetigi.
Satyp alýdyń bul múmkindigin paıdalaný úshin Tax Free stıkerleri (japsyrmalary) bar saýda nysandarynda saýda jasalýy tıis. Elden shyǵar kezde áýejaıdan da QQS-ny qaıtaryp alýǵa bolady. Ázerbaıjanda barlyq taýarǵa QQS stavkasy 18 paıyzdy quraıdy.
Dúkenderde Tax Free stıkerlerimen taýardy satyp alǵan kezde satýshyǵa osy júıe múmkindikterin paıdalanǵysy keletini jaıly aıtý qajet. Odan ári sheteldik azamattyǵyn rastaıtyn tólqujatyn kórsetip, elektrondyq salyq shot faktýrasyn toltyrý qajet.
