Ázerbaıjanda taksı júrgizýshilerinen COVID-pasport talap etiledi

BAKÝ. QazAqparat – Ázerbaıjanda taksı júrgizýshileri kelesi aıdyń basyna deıin mindetti túrde koronavırýsqa qarsy tolyq vaktsınalaýdan ótýi tıis. Bul týraly Іshki ister mınıstrligi baspasóz qyzmetiniń BAQ jáne qoǵammen baılanys bóliminiń bastyǵy polıtsııa maıory Elshad Gadjıev málim etti, dep habarlaıdy QazAqparat tilshisi.

Onyń aıtýynsha, 1 qazannan bastap elde taksı júrgizýshileriniń COVID-pasporttaryn tekserý boıynsha reıdter bastalady. Polıtsııa qyzmetkerleri ekpeniń ekinshi dozasyn almaǵan júrgizýshilerge qatysty tıisti sharalardy qoldanatyn bolady.

«Júk jáne jolaýshy tasymaldaýmen aınalysatyn, olardyń ishinde taksı qyzmetterin usynatyn azamattardyń 1 qyrkúıekten bastap vaktsınanyń birinshi dozasyn alǵany týraly qujaty bolýy kerek. 1 qazannan bastap ekinshi dozany qabyldaǵany týraly qujat nemese ımmýnıtet sertıfıkaty talap etiledi», - dedi E. Gadjıev.

Eske sala keteıik, 1 qyrkúıekten bastap JOO stýdentterinen, qonaqúı meımandarynan, iri SOSO-ǵa jáne qoǵamdyq tamaqtaný oryndaryna barýshylardan COVID-pasport suralady. Al 16 tamyzdan bastap DOST jáne ASAN xidmət ortalyqtaryndaǵy áleýmettik qyzmetti tek vaktsına alǵan turǵyndar ǵana ala alady.

COVID-pasport nemese tıisti sertıfıkattar muǵalimder men mektep qyzmetkerlerinen de talap etiledi. Qoǵamdyq transportty paıdalaný úshin jolaýshylardyń ózderimen birge osyndaı qujaty bolýy kerek. Sonymen qatar medıtsınalyq maskany taǵyp, sanıtarlyq normalardy saqtaý mindetti.

COVID-pasporty joq jeke tulǵalar 120-240 dollar, al zańdy tulǵalar 2 350-2 940 dollar kóleminde aıyppul tóleıdi.

Búgingi kúni Ázerbaıjanda koronavırýsqa qarsy 7 mıllıon 977 myń 574 ekpe salyndy. Birinshi dozany alǵan turǵyndar sany – 4 mıllıon 619 myń 842 adam, al ekinshi dozany saldyrǵandar sany – 3 mıllıon 357 myń 732.