Ázerbaıjanda shekara qyzmetkeri mınaǵa túsip qaldy

BAKÝ. QazAqparat – Ázerbaıjannyń Memlekettik shekara qyzmetiniń (MShQ) áskerı qyzmetshisi Zangılan aýdany aýmaǵynda jaıaý áskerge qarsy mınany basyp, jarylyp ketti. Bul týraly Ázerbaıjan MShQ-dan málim etti, dep habarlaıdy QazAqparat menshikti tilshisi.

Vedomstvonyń málimdeýinshe, Ázerbaıjan MShQ asa jedel áskerı qyzmetiniń áskerı qyzmetshisi, kishi serjant Nazarhanly Elgıýn Elhan oglý 30 qyrkúıekte saǵat 15:00-de Zangılan aýdany aýmaǵynda qyzmetin atqarý barysynda jaıaý áskerge qarsy mınany basyp jarylyp, jaraqat alǵan. Alǵashqy medıtsınalyq kómek kórsetilgennen keıin áskerı qyzmetshi tikushaqpen Fızýlın aýdany Ahmedbeılı aýylynda áskerı gospıtalge jetkizildi. Qazirgi ýaqytta ol dárigerlerdiń baqylaýynda.

Ázerbaıjan Bas prokýratýrasynyń aqparatyna sáıkes, 2020 jyldyń 10 qarashasynda Ázerbaıjan men Armenııa arasyndaǵy áskerı qaqtyǵystan keıin mına jarylysynan 23 adam qaza taýyp, 36 azamattyq tulǵa jaraqat alǵan.