Ázerbaıjanda shekara qyzmetiniń laýazymdy bir top ókili qamaýǵa alyndy

BAKÝ. QazAqparat - Ázerbaıjanda Memlekettik shekara qyzmetiniń alty ofıtseri qamaýǵa alyndy, dep habarlaıdy QazAqparat Trend agenttigine silteme jasap.

Memlekettik qaýipsizdik qyzmeti men Bas prokýratýra birlesken tergeý sharasy kezinde Kaspıı teńizindegi memlekettik shekarany kesip ótý jáne ózge de zańǵa qaıshy áreketter baılanysty faktiler anyqtalǵan.

Birlesken sharalardyń nátıjesinde Ázerbaıjan Memlekettik shekara qyzmeti (MShQ) bastyǵynyń orynbasary, general-leıtenant Afgan Nagıev pen onyń qolastyndaǵy qyzmetkerler – MShQ jaǵalaý kúzetiniń bastyǵy polkovnık Nemat Panahov, polkovnık-leıtenant Elchın Velıev, polkovnık Samıg Ázızov, polkovnık-leıtenant Sakıt Mýradov, maıor Mýzaffar Namazov jáne taǵy basqalary, qyzmetin teris maqsatta paıdalanyp Kaspıı teńizinde zańsyz balyq aýlaýshylarǵa jaǵdaı jasaǵany úshin para retinde aqsha alǵan.

Tergeý barysynda atalǵan laýazymdy tulǵalardyń ár aıdyń sońynda Afgan Nagıevtiń kabınetinde oǵan para retinde jıǵan aqshany tapsyrǵany, al Afgan Nagıevtiń top músheleri arasynda úlestirý úshin olarǵa belgili bir paıyzyn qaıtaryp otyrǵany anyqtaldy.

Laýazymdy tulǵalardyń qyzmet oryndary men úılerin tekserý barysynda olardyń alǵan aqshalaı qarajaty týraly túrli jazbalar, sondaı-aq túrli valıýtada saqtalǵan aqsha, qylmystyq is úshin mańyzdy ózge de qujattar men aıǵaq dálelder tabylǵan.

Atalǵan faktige baılanysty Ázerbaıjannyń Bas prokýrory janyndaǵy Sybaılas jemqorlyqqa qarsy kúres boıynsha bas basqarma Ázerbaıjan Qylmystyq kodeksiniń 308.1 jáne 311.3.1 baptary boıynsha qylmystyq is qozǵaldy. Aıyptalýshylar Baký áskerı sotynyń sheshimimen qamaýǵa alyndy jáne qyzmetterinen shettetildi.

Eske sala ketsek, 30 sáýirde qazaqstandyq shekarashylar Kaspıı teńiziniń qazaqstandyq bóliginde Ázerbaıjannyń 4 azamaty mingen «baıda» úlgisindegi qaıyqty ustaǵan bolatyn.