Ázerbaıjanda onlaın nesıe rásimdeý tártibi ózgeredi
ASTANA. KAZINFORM – Ázerbaıjanda 1 qazannan bastap tutynýshylyq nesıeni qashyqtan rásimdeý jáne kredıttik lımıtti ulǵaıtýǵa qatysty jańa talaptar kúshine enedi, dep habarlaıdy Kazinform agenttiginiń Bakýdegi menshikti tilshisi.
Ázerbaıjan Ortalyq bankiniń sheshimine sáıkes, azamattar bankke nemese banktik emes kredıttik uıymǵa jazbasha ótinish berip, tutynýshylyq nesıeni qashyqtan rásimdeýge nemese kredıttik lımıtti arttyrýǵa shekteý qoıa alady.
Bul shekteýdi banktiń bólimshesine jeke barý, kúsheıtilgen elektrondyq qoltańba nemese klıentti kúsheıtilgen aýtentıfıkatsııalaý arqyly alyp tastaýǵa bolady.
Nesıe rásimdeý kezinde bankter men banktik emes kredıttik uıymdar mundaı shekteýdiń bar-joǵyn óz júıelerinen jáne kredıttik bıýronyń aqparattyq júıesi arqyly tekserýge mindetti. Eger klıent shekteý qoıǵan bolsa, qashyqtan kredıt shartyn jasaýǵa nemese lımıtti arttyrýǵa jol berilmeıdi.
Shekteý qoıǵan klıent qashyqtan nesıe rásimdeýge nemese lımıtti ulǵaıtýǵa áreket jasaǵan jaǵdaıda bank ony mobıldi qosymsha nemese SMS arqyly dereý habardar etýi tıis.
Sonymen qatar qashyqtan rásimdelgen tutynýshylyq nesıe qarajaty shart jasalǵannan keıin birden berilmeıdi. Eger bir kún ishinde berilgen nemese ulǵaıtylǵan nesıe somasy eń tómengi jalaqynyń eki eselengen mólsherinen aspasa, qarajat eki saǵattan keıin qoljetimdi bolady. Al bul mólsherden asqan jaǵdaıda 24 saǵattyq kútý merzimi belgilenedi.
Jańa talaptarǵa sáıkes, kredıt shartynda belgili bir jaǵdaılarda qaryz alýshyny berilgen nemese ulǵaıtylǵan nesıe boıynsha mindettemelerden bosatýǵa qatysty ereje de qamtylady. Qashyqtan jasalatyn sharttarda klıent belgilegen shekteý týraly aqparat kórsetiledi.
Jańa talaptar 1 qazannan bastap kúshine enedi.
Aıta keteıik, buǵan deıin Túrkııa smartfondy nesıege alǵansha, bankten jalǵa alýdy usyndy.
