Ázerbaıjanda Novrýz merekesine daıyndyq bastaldy

BAKÝ. QazAqparat – Ázerbaıdanda búgin Novrýz merekesiniń aldynda alǵashqy seısenbi kúni «sý chershenbesı» (sý seısenbisi) atap ótilýde, dep habarlaıdy QazAqparat menshikti tilshisi.

Búginnen bastap Novrýz merekesine daıyndyq bastaldy. Ańyzǵa sáıkes, Qudaı birinshi sýdy jaratqan, sondyqtar alǵashqy seısenbide «Sý chershenbesı» atalyp ótiledi. Keıbir derekkózder bul kúndi «alǵashqy seısenbi», «gúldi seısenbi» dep te ataıdy.

Ejelgi nanymǵa sáıkes, «Sý chershenbesı» sýǵa tabyný kúni bolyp sanalady. Kún shyqqan boıda «jańa sý» jınaý kerek, ol sý myńdaǵan aýrýǵa em degen senim bar. Novrýz merekesi kóktemniń jarshysy jáne jyldyń basy bolyp sanalady. Sondyqtan adamdar osy jyl sý sııaqty móldir jáne tunyq bolýyn suraıdy. Bul kúni alǵashqy ot jaǵylady, bul muzdyń erip, qystyń artta qalǵanyn kórsetedi.

Birinshi seısenbide - «Sý chershenbede» ústelde sý turýy kerek. Eger ústelge sý tógilse, bul jaqsy yrym bolyp sanalady, ıaǵnı jyl molshylyq pen baılyq ákeledi. Bul kúni aǵyp jatqan sýdan ótýge bolmaıdy, bul sátsizdikke ákelýi múmkin.

Ázerbaıjanda 2 naýryzda «Od chershenbe» (órt seısenbisi), 9 naýryzda – «Iel chershenbe» (jel seısenbisi) atalyp ótedi. Novrýzdyń «Torpag chershenbesi» (jer seısenbisi) 16 naýryzǵa keledi. Seısenbide, tórt apta boıy Novrýzdyń aldynda aýlalarda ot jaǵylady, dástúr boıynsha eski jyly barlyq qıynshylyqtar men qaıǵy-qasiretti artta qaldyrý úshin ottan úsh ret sekirý kerek.

Aıta keteıik, bıyl kóktem Ázerbaıjanda 20 naýryz kúni saǵat 13:37-de kiredi. 20 naýryzda elde mereke qarsańy, al 21 naýryzda merekeniń ózi toılanady.

Avtory: Serikbol Qoshmaǵanbetov