Ázerbaıjanda nóser saldarynan bolǵan sý tasqyny Nabran týrıstik aımaǵyn qıratty
ASTANA. KAZINFORM — 4–5 sáýir kúnderi toqtaýsyz jaýǵan nóserli jańbyrlar men ózenderdiń arnasynan shyqqan laı sýy Ázerbaıjannyń Nabran týrıstik aımaǵyna eleýli zııanyn tıgizdi, dep habarlaıdy AZERTADJ.
Hachmaz aýdany atqarýshy bıliginiń dereginshe, Istısý kentinde jeke sharýashylyqtar, egistik alqaptar, jol ınfraqurylymy jáne elektr júıeleri qatty zardap shekti. Tabıǵı apat saldarynan kenttegi 150-den astam jeke turǵyn úı zaqymdalǵan.
Nabran aýylynda ózen arnasynan shyqqan laı sý turǵyn úılerdiń aýlasyna, týrıstik nysandarǵa jáne aýyl joldaryna aıtarlyqtaı zalal keltirgen.
Apat saldaryn tez arada joıý, zardap shekken turǵyndarǵa qajetti kómek kórsetý jáne tıisti sharalardy qabyldaý maqsatynda Aýdandyq tótenshe jaǵdaılar komıssııasynyń múshelerine jáne tıisti qyzmet kórsetý aımaqtarynyń basshylaryna tapsyrmalar berildi.
Aýdan aýmaǵyndaǵy ózenderdiń arnasynan shyǵýy saldarynan Nııazoba aýylynda da 105 turǵyn úı zaqymdaldy. Kúshti nóser kezinde laı sýynan basqa úılerge zııan keltirmeý úshin dıametri 1500 mm qosymsha temirbetondy sý ótkizý qubyry ornatyldy, sonymen qatar aýmaqqa úzdiksiz transporttyq qatynasty qamtamasyz etý úshin balama jol salyndy.
Qazirgi tańda aımaqta qutqarý, qalpyna keltirý jáne rekonstrýktsııalaý jumystary júrgizilip jatyr.
Buǵan deıin naýryz aıynyń sońynda Ázerbaıjanda sý tasqyny saldarynan 118 adam, onyń ishinde 25 bala evakýatsııalanǵany habarlandy.
