Ázerbaıjanda Naýryzǵa daıyndyq bir aı buryn bastaldy

BAKÝ. QazAqparat - Ázerbaıjanda Naýryz merekesine daıyndyq bir aı buryn bastalyp ketti, dep habarlaıdy QazAqparat.

Ulystyń uly kúnine deıin ázerbaıjandar tórt chershenbeni (meıram qarsańyndaǵy seısenbi): sý chershenbesin, ot chershenbesin, topyraq chershenbesin jáne sońǵy chershenbeni toılaıdy. Alǵashqy chershenbe 2018 jyly 27 aqpanǵa týra keledi.

Halyq nanym-senimi boıynsha, sý chershenbesinde sý «oıanady», muz qatqan sý ataýlynyń barlyǵy erip, qozǵala bastaıdy. Keıingi chershenbelerde ot jáne jer oıanady. Sońǵy chershenbede aǵash búrshik jaryp, kóktem keledi.

Ázerbaıjandar sý chershenbesinde úıin sýmen jýyp-shaıyp, ózderi de eń jaqyn jerdegi aǵyn sýǵa baryp, shomylý qajet dep sanaıdy. Al ózenge sekirý ótken jylǵy qıyndyqtardan aryltady.