Ázerbaıjanda munaı men gaz eksporty ósti

BAKÝ. QazAqparat – Ázerbaıjannyń Energetıka mınıstrligi qańtar men qyrkúıek aralyǵyndaǵy munaı men gaz óndirý jáne onyń eksportyna qatysty esepti jarııalady, dep habarlaıdy QazAqparat.

Mınıstrliktiń habarlaýynsha, bıylǵy qańtar-qyrkúıekte Ázerbaıjanda 24,5 mln tonna munaı men onyń kondensaty óndirildi. Atalǵan merzimde suıyq kómirtegilerdiń kólemi 5,3%-ke nemese 1,36 mln-ǵa azaıdy. Basqasha aıtqanda munaı kóleminiń tómendeýi 10 mln barrelden kóp boldy.

Bul rette Ázerbaıjanda qańtar-qyrkúıek aılary aralyǵynda «kógildir otynnyń» jalpy óndirisi (munaı skvajınalaryna toltyrylǵan gaz kólemin qosa alǵanda) 34,4 mlrd m3-di qurady. Bul ótken jyldyń 9 aıyndaǵy kórsetkishten 8,6% kóp.

Munaı eksportyna keletin bolsaq, bul kórsetkish 2021 jyldyń sáıkes merzimimen salystyrǵanda 8,6%-ke ósti. Osylaısha, bıylǵy jyldyń qańtar-qyrkúıeginde Ázerbaıjan 19,7 tonna «qara altyn» eksporttady. Bul rette esepte qańtar-qyrkúıek aralyǵynda elde óndirilgen munaıdyń 80% eksporttalǵany aıtylady.

Serikbol Qoshmaǵambetov