Ázerbaıjanda memleketke opasyzdyq jasady dep aıyptalǵan er adam Iordanııada ustaldy

ASTANA. KAZINFORM — Ázerbaıjannyń Memlekettik qaýipsizdik qyzmetiniń is materıaldaryna sáıkes, ustalǵan azamat úshinshi elderde dıversııalyq áreketterdi daıyndaýǵa kómektesken, dep habarlaıdy Kazinform menshikti tilshisi.

Tyńshylyq jasady dep aıyptalǵan Azer Bagırov Memlekettik qaýipsizdik qyzmetiniń arnaıy sharalarynyń nátıjesinde Iordanııa Hashımıt Koroldiginiń aýmaǵynda ustalyp, Ázerbaıjanǵa jetkizildi. 

— Bagırov Azer Akıf oǵlyny syrtqy barlaý qyzmeti úshinshi elderde arandatýshylyqty uıymdastyrý úshin tartqan. Onyń múddesi úshin áreket ete otyryp, ol tyńshylyqpen aınalysyp, Ázerbaıjannyń ulttyq qaýipsizdigine nuqsan keltirdi, — delingen habarlamada.

Ustalǵan azamatqa Qylmystyq kodekstiń 274-baby (memleketke opasyzdyq jasaý) boıynsha aıyp taǵyldy. 

Qarasha aıynyń basynda halyqaralyq izdeý jarııalanǵan Allahverdı Mamedov Germanııadan Ázerbaıjanǵa ekstradıtsııalandy. Ol alaıaqtyq, para berý, jalǵan qujattar jasaý jáne zańsyz kóshi-qondy uıymdastyrdy dep aıyptaldy.

Tamyz aıynda Baký aýyr qylmystar soty dúısenbi kúni Armenııanyń barlaý qyzmetimen jasyryn yntymaqtastyq jasaǵany úshin aıypty dep tanylǵan Ázerbaıjan azamattaryna qatysty úkim shyǵardy. 

Aıyptaý qorytyndysyna sáıkes, Rashad Ahmedov «armıan arnaıy qyzmetiniń tapsyrmalaryn jasyryn túrde óz eliniń egemendigi men qaýipsizdigine nuqsan keltirip, qarjylyq múddege aıyrbastap otyrǵan». Ol Rovshan Ámirovpen jáne basqalarmen birge ultaralyq jáne dinı arazdyqty qozdyratyn beınerolıkter jasap, keıin YouTube platformalarynda jáne basqa da áleýmettik jelilerde taratqan.