Ázerbaıjanda laıly janartaý atqylady
BAKÝ. QazAqparat - Jeksenbi kúni Bakýde Otman-Bozdag janartaýy atqylady. Bul týraly Ekologııa jáne tabıǵı resýrstar mınıstrligi Baký jáne Apsheron túbegindegi laıly janartaý toby memlekettik tabıǵı qoryǵynyń dırektory Djeıhýn Pashaev málim etti, dep habarlaıdy Trend.
Laıly janartaý tańǵy saǵat 08.53-te, keıin 09-58 de atqylady. Qazirgi ýaqytta atqylaý protsesi jalǵasýda. Jalynnyń bıiktigi 200-300 metrdi qurap otyr. Taý mańaıynda tereńdigi 40 metrge jetetin jaryqtar paıda boldy.
Kólemi jóninen álemdegi ekinshi janartaý sanalatyn Otman-Bozdagta sońǵy ret laıdyń atqylaýy 2017 jyldyń 6 aqpanynda bolǵan edi.
