Ázerbaıjanda koronavırýs juqtyrýdyń rekordtyq kórsetkishi tirkeldi

BAKÝ. QazAqparat – Ótken táýlikte Ázerbaıjanda koronavırýs juqtyrýdyń 7704 jańa jaǵdaıy anyqtaldy, dep habarlaıdy QazAqparat tilshisi. Bul týraly Ázerbaıjannyń Mınıstrler kabıneti janyndaǵy jedel shtab málimet taratty.

Resmı málimet boıynsha, ótken táýlikte Ázerbaıjanda COVID-19 ınfektsııasynan 4109 naýqas jazylyp shyqsa, 23 naýqas qaıtys bolǵan.

Búginge deıin Ázerbaıjanda 691 180 adam koronavırýs juqtyryp, 8 846 adam qaıtys bolǵan. 641 538 adam jazylyp shyqqan. 40 796 adam em alyp jatyr.

Elde COVID-19 vırýsyn anyqtaý úshin 6 248 414 test tapsyrylǵan. Sońǵy 24 saǵattyń ishinde - 20 531 adamnan synama alynǵan.

Búgingi tańda COVID-19-ǵa qarsy 186 279 doza vaktsınasy salynǵan. 5 245 925 adam vaktsınanyń birinshi dozasyn,4 750 763 adam ekinshi dozasyn, 2 189 591 adam úshinshi (býsterlik) dozasyn alǵan.

Osynyń arqasynda vırýs juqtyrǵandar sany óskenine qaramastan, ólim jaǵdaıy salystyrmaly túrde tómen deńgeıde qalyp otyr. Mamandar muny naýqastardyń kópshiligi úıde emdeletindigimen jáne vırýstyń sımptomsyz sıpatta ótip jatqanymen, pnevmonııa túrindegi asqynýlar sırek kezdesetindigimen baılanystyrady.

Degenmen dárigerler halyqty saqtyq sharalaryn saqtaýǵa shaqyryp otyr.

4 aqpanda Ázerbaıjan Úkimetiniń jedel shtaby koronavırýs juqtyrýdyń 7050 jaǵdaıy tirkelgenin habarlaǵan bolatyn.

Serikbol Qoshmaǵanbetov