Ázerbaıjanda koronavırýs ınfektsııasynan eki adam qaıtys boldy

BAKÝ. AZERTADJ-QazAqparat – Ázerbaıjan Respýblıkasynda COVİD-19 koronavırýs ınfektsııasyn juqtyrǵan eki adam kóz jumdy. Bul týraly eldiń Mınıstrler kabıneti janyndaǵy Jedel shtab málim etti, dep habarlaıdy QazAqparat AZERTADJ agenttigine silteme jasap.

Jedel shtab habarlamasynda Ázerbaıjan Respýblıkasynyń 1931 jyly týǵan azamaty qant dıabetimen aýyrǵany kórsetilgen. Al qaıtys bolǵan ekinshi adam - 1956 jyly týǵan ÁR azamaty, júrektiń ıshemııalyq aýrýymen, arterııalyq gıpertenzııamen jáne qant dıabetimen aýyrǵan.

Olardyń COVID-19-ǵa testileri oń nátıje kórsetken. Naýqastardyń densaýlyǵyn turaqtandyrýǵa arnalǵan reanımatsııalyq sharalar nátıje bermegen.

Qazirgi ýaqytta qaıtys bolǵan patsıentterdiń otbasy músheleri, sondaı-aq olarmen baılanysta bolǵan adamdar anyqtalyp, karantınge alyndy.