Ázerbaıjanda kólik-kommýnıkatsııa holdıngi quryldy

ASTANA.KAZINFORM - Beısenbi kúni Ázerbaıjan prezıdenti Ilham Álıev Ázerbaıjan kólik jáne kommýnıkatsııa holdıngin (AZCON) qurý týraly jarlyqqa qol qoıdy.

Sondaı-aq holdıngtiń basqarýyna beriletin memlekettik kásiporyndardyń, jarııa quqyqtaǵy zańdy tulǵalardyń jáne memlekettik úlesi bar kásipkerlik sýbektileriniń tizbesi bekitildi.

Jańadan qurylǵan qurylym quramyna «Azerbaıdjan Hava Iolları», «Ázerbaıjan Kaspıı teńiz kemejaıy kompanııasy», «Baký metropolıteni», «Baký halyqaralyq teńiz saýda porty», «BakuBus», «Baký keme jasaý zaýyty», «Azerkosmos», «Aztelekom» aktsıonerlik qoǵamy, «Azerbaijan International Telecom» jáne «Azerpost» kirdi.

AZCON qyzmetine jalpy basshylyqty baqylaý keńesi, al aǵymdaǵy basshylyqty atqarýshy dırektor júzege asyrady. Holdıngtiń jarǵylyq qory 10 mln manat deńgeıinde aıqyndaldy jáne onyń basqarýyna berilgen memlekettik kásiporyndar tóleıtin qarajat esebinen qalyptastyrylatyn bolady.

Ózgerister kólik-kommýnıkatsııa salasynda jumys isteıtin memlekettik kásiporyndardyń jumysyn jetildirýge baǵyttalǵan. Memleket sonymen qatar bul mnhanızm ekonomıkalyq rentabeldilákti jáne memlekettik bıýdjettiń kiristiligin arttyrady dep senedi.

Biz buǵan deıin Ázerbaıjan men Ózbekstan Jerdi qashyqtan zondtaýdyń ulttyq ǵarysh júıesin qurýdy qarastyryp jatqanyn jazǵan bolatynbyz.