Ázerbaıjanda qazaq mádenıetin tanytatyn 69 tarıhı jádiger kópshilik nazaryna usynyldy

ASTANA. KAZINFORM – Ázerbaıjannyń Ulttyq tarıh mýzeıinde «Qazaqtyń dástúrli mádenıeti» atty halyqaralyq kórme ashyldy, dep habarlady QR Mádenıet jáne aqparat mınıstrligi.

p
Foto: Mádenıet mınıstrligi

Kórmege QR Ulttyq ortalyq mýzeıiniń qoryndaǵy 69 etnografııalyq jádiger qoıylǵan.

Іs-sharaǵa Qazaqstan Respýblıkasy Ulttyq ortalyq mýzeıiniń, Qazaqstannyń Ázerbaıjandaǵy elshiliginiń, Túrki mádenıeti jáne murasy qorynyń, Ázerbaıjannyń Ulttyq tarıh mýzeıi men Mádenıet mınıstrliginiń ókilderi, sondaı-aq jazýshylar men mádenıet qaıratkerleri qatysty.

– Bes taqyryptyq bólimnen turatyn kórmege 69 etnografııalyq jádiger qoıylǵan. Olardyń qatarynda kúndelikti turmys pen sharýashylyqqa arnalǵan buıymdar, at ábzelderi, zergerlik buıymdar, kıiz basý jáne toqymashylyq óneriniń úlgileri, dástúrli kıimder men ulttyq áshekeıler bar, – delingen mınıstrlik habarlamasynda.

Kórmege qoıylǵan jádigerler qazaq halqynyń dástúrli turmysyn, qolónerin jáne ulttyq mádenıetin tanystyrady.

Aıta keteıik, buǵan deıin Berlınde Qazaqstan kınosy kúnderi ótip, nemis kórermenderine «Qazaq handyǵy. Almas qylysh» jáne «Jeruıyq» fılmderi usynylǵan bolatyn.