Ázerbaıjanda Kaspıı men Qara teńizdi jerasty týnnelimen baılanystyrý usynyldy

ASTANA. KAZINFORM — Bul bastama Kaspıı teńiziniń taıazdanýymen kúresýge jáne túrki elderiniń kóliktik ıntegratsııasyn nyǵaıtýǵa baǵyttalǵan, dep habarlaıdy Minval.

ADOG jáne Zıra halyqaralyq porty Kaspıı men Qara teńizdi baılanystyratyn jerasty týnneliniń qurylysyna bastamashy boldy. Jobaǵa sáıkes, Qara teńizdi (Grýzın nemese Reseı jaǵynan) Kaspıı teńizimen baılanystyratyn dıametri 10 metr jerasty týnnelin salý usynyldy.

— Sý deńgeıiniń tabıǵı aıyrmashylyǵynyń arqasynda Qara teńiz sýy tartylys kúshimen Kaspıı teńizine sorǵylardy qoldanbaı-aq quıa alady, — delingen kompanııa dırektory, ınjener Musa Súleımanovtyń resmı málimdemesinde.

Kompanııanyń habarlaýynsha, bul bastama sońǵy jyldary deńgeıi kúrt tómendep bara jatqan Kaspıı teńiziniń sý balansyn turaqtandyrýǵa baǵyttalǵan. Bul jaǵalaýdaǵy memleketterge, sonyń ishinde Qazaqstanǵa da eleýli ekologııalyq, ekonomıkalyq jáne ınfraqurylymdyq qaýip týǵyzady.

Kompanııa jobany júzege asyrý tolyq ekologııalyq monıtorıng pen bıologııalyq ártúrlilikti saqtaý sharalarymen qatar júretinin atap ótti.

ADOG bul bastamany memlekettik deńgeıde qaraýdy usynady. 

Qańtar aıynda Qazaqstanda Kaspıı teńizindegi sý deńgeıiniń aýytqýyn zertteý úshin sarapshylardan turatyn jumys toby qurylyp jatqany habarlanǵan bolatyn.