Ázerbaıjanda karantın rejımi jeńildedi

BAKÝ. QazAqparat – Ázerbaıjan Mınıstrler kabıneti janyndaǵy jedel shtab eldegi karantın rejımin jeńildetetin birqatar shara qabyldady, dep habarlaıdy QazAqparat Trend-ke silteme jasap.

Jedel shtab karantın rejımin 2021 jylǵy 1 sáýirge deıin uzartý týraly sheshim qabyldaǵan.

Jańa sharalar 18 qańtardan bastap turǵylyqty jerinen ketýge ruqsat alý úshin SMS ruqsat alý tártibin joıǵan.

Jańa erejelerge sáıkes, 25 qańtardan bastap shashtaraz salondary, dúkender, murajaılar men kórme zaldaryn, al 1 aqpannan bastap tamaqtaný oryndary, kafeler men meıramhanalar qaıta ashylady.

Qoǵamdyq kólikter demalys kúnderi búkil elde jumys istemeıdi. Al Baký metropolıteni jabyq kúıinde qalady.

Saýda ortalyqtary, iri saýda ortalyqtary, oqý oryndary, kýrstar ázirge bastalmaıdy. Alaıda mektepterdi ashý týraly sheshim kelesi aptada Bilim mınıstrliginiń qatysýymen ótetin brıfıng barysynda jarııalanady.

Barlyq jerde maska kııý kerek.

25 qańtardan bastap Baký, Sýmgaıt, Gıandja, Mıngechevır, Shırvan jáne Apsheron qalalaryn, sondaı-aq Lankoran, Masallı, Jalılabad, Shekı, Zagatala, Gýba, Hachmaz, Evlah, Barda, Bilasývar jáne Ismaılly aımaqtyq ortalyqtaryn qospaǵanda kirý-shyǵý múmkindigine ruqsat beriledi.

Sonymen qatar, Ázerbaıjanda halyqty vaktsınatsııalaý 18 qańtarda bastalatyny, birinshi kezeńde medıtsınalyq qyzmetkerlerge ekpe jasalatyny belgili boldy. 1 aqpanda ekinshi kezeń bastalyp, 65 jastan asqan adamdarǵa vaktsınatsııa salynady.

Eske sala keteıik, buǵan deıin koronavırýs ınfektsııasynyń taraýyna baılanysty Ázerbaıjan bıligi búkil elde 14 jeltoqsannan 18 qańtarǵa deıin kúsheıtilgen karantın rejımin engizý týraly sheshim qabyldaǵan edi.

Ótken táýlikte elde koronavırýs ınfektsııasyn taǵy 402 adam juqtyrǵan. 650 adam saýyǵyp, 15 kóz jumǵan bolatyn.