Ázerbaıjanda karantın 2021 jyldyń 31 qańtaryna deıin uzartyldy

BAKÝ. ÁZERTADJ-QazAqparat – Ázerbaıjanda Mınıstrler kabıneti janyndaǵy jedel shtab jańa qaýlyny qabyldap, keıbir shekteýlerdi 2021 jyldyń 31 qańtaryna deıin uzartty. Qaýlyny qabyldaýǵa sońǵy aılarda elde koronavırýs ınfektsııasyn juqtyrǵandar sanynyń artýy sebep boldy, dep habarlaıdy QazAqparat tilshisi Ázertadj agenttigine silteme jasap.

Qaýlyǵa sáıkes, eldegi erekshe karantın tártibiniń merzimi 2021 jyldyń 31 qańtary, saǵat 06.00-ge deıin uzartyldy. 14 jeltoqsan men keler jyldyń 18 qańtary aralyǵynda búkil el aýmaǵyna qatań karantın engiziledi.

Osy aralyqta eldiń Mınıstrler kabınetiniń sheshiminde kórsetilgen mekemelerden basqa qyzmet kórsetý salasynyń jumysy toqtatylady.

Barlyq saýda uıymdary men qoǵamdyq tamaqtaný oryndaryna klıentterge jetkizý qyzmetin nemese onlaın rejımde qyzmet kórsetýge ruqsat etilgen.

Sondaı-aq Baký, Sýmgaıyt, Gıandja, Mıngıachevır jáne Shırvan qalalary, Apsheronskıı aýdany, sonymen qatar Lenkoran, Masally, Djalılabad, Shekı, Zagatala, Gýba, Hachmaz, Evlah, Barda, Bılıasývar jáne Ismaıllınsk aýdan ortalyqtaryndaǵy qozǵalys shekteledi.

Osy aımaqtarda jumys isteıtin adamdar qyzmettik karta arqyly nemese iiicaze.e-gov.az veb-saıtyna jumys berýshi aqparat engizse ǵana júrip-tura alady.

Mınıstrler kabıneti janyndaǵy Jedel shtabtyń 9 jeltoqsandaǵy málimeti boıynsha Ázerbaıjanda bir táýlikte 4403 ınfektsııa juqtyrý oqıǵasy tirkelip, qaıtys bolǵandar sany 42 bolǵan.