Ázerbaıjanda Izraıl elshiligine qarsy terakt jasaý áreketiniń joly kesildi
ASTANA. KAZINFORM – Bakýde Ázerbaıjannyń Memlekettik qaýipsizdik qyzmetiniń (MQQ) qyzmetkerleri Izraıldiń dıplomatııalyq mıssııasyna shabýyl daıyndady degen kúdikpen úsh jergilikti turǵyndy ustady. Bul týraly Kazinform agenttiginiń menshikti tilshisi The Times of Israel basylymyna silteme jasap habarlady.
Ustalǵandar — Ilgar Gýlıev (2000 j.t.), Amın Pırıev (2005 j.t.) jáne Elvın Alızade (2005 j.t.). Olar «Vılaıatı-Horasan» terrorıstik uıymynyń qarýly qanatymen baılanys ornatyp, shabýyl jasaýǵa arnalǵan zattardy satyp alǵan. Shabýylǵa daıyndyq birneshe aı boıy júrgizilgen.
MQQ málimetinshe, kúdiktiler elshilik ǵımaratyna jaqyndaǵan sátte qolǵa túsken. Olarǵa qatysty Ázerbaıjan Qylmystyq kodeksiniń terakt daıyndaý jáne qarý qoldanýǵa baılanysty birneshe baby boıynsha qylmystyq is qozǵaldy. Sot tergeý aıaqtalǵanǵa deıin olardy qamaýda ustaý týraly sheshim shyǵardy.
Atalǵan is boıynsha jedel-tergeý sharalary jalǵasyp jatyr.
BAQ derekterine sáıkes, ustaýlar Izraıldiń syrtqy ister mınıstri Gıdeon Saardyń 26 qańtarda Bakýge jasaǵan saparynan keıin kóp uzamaı júzege asyrylǵan.
Buǵan deıin de Ázerbaıjannyń Memlekettik qaýipsizdik qyzmeti el aýmaǵynda iri teraktiler daıyndaý maqsatynda qurylǵan terrorıstik uıashyqty uıymdastyrýǵa qatysqan birneshe negizgi tulǵany ustaǵan bolatyn.