Ázerbaıjanda Irannan oralǵan úsh adamnan koronavırýs tabyldy

BAKÝ. Trend – QazAqparat – Irannan oralǵan Ázerbaıjannyń úsh azamatynan COVİD-19 koronavırýsy anyqtaldy, dep habarlaıdy QazAqparat Trend agenttigine silteme jasap.

Eldiń Mınıstrler kabınetindegi jedel shtab osyndaı málimet taratty.

Úsheýdiń bireýi - 1938 jylǵy er adam Irannan kelgen soń biraz ýaqyttan keıin densaýlyǵynyń nasharlap ketýine baılanysty aýrýhanaǵa júgingen. Tekserý kezinde odan pnevmonııa tabylyp, zerthana synamasy koronavırýs ınfektsııasyn juqtyrǵanyn rastady. Qazirgi ýaqytta syrqattyń jaǵdaıy jaqsarǵan.

Qalǵan ekeýi 1993 jáne 1994 jylǵy stýdentter. Olar Irannyń Gým qalasynda oqıdy. Iran-Ázerbaıjan shekarasynan ótken kezde olar karantınge jatqyzylǵan. Olardan koronavırýs ınfektsııasy tabyldy. Olardyń jaǵdaıy birqalypty, ekeýinde de dene qyzýy joq.

Jedel shtabtyń málimdeýinshe, úsh naýqas erekshe rejimdegi aýrýhanaǵa jatqyzylǵan, olardy emdeýge qatysty tıisti sharalar qolǵa alynǵan.